សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ ខណៈដែលទំនាក់ទំនងទ្វេភាគីរវាងចិន និងអូស្ត្រាលីកាន់តែធ្លាក់ចុះត្រដាប់ត្រដួសបន្ថែមទៀត កាលពីថ្ងៃ៣០ វិច្ឆិកាថ្មីៗកន្លងទៅនេះអ្នកនាំពាក្យក្រសួងការបរទេសចិន បដិសេធមិនសុំទោសតាមការទាមទាររបស់នាយករដ្ឋមន្ត្រីអូស្ត្រាលី ពាក់ព័ន្ធការបង្ហោះរូបថតសកម្មភាពទាហានអូស្ត្រាលីលើកុមារអាហ្វហ្កានីស្ថាន។ ប៉ុន្តែក្រសួងការបរទេសចិន បានប្រាប់ឲ្យអូស្ត្រាលីទៅសុំទោសអាហ្វហ្កានីស្ថានវិញចំពោះទង្វើអមនុស្សធម៌របស់ខ្លួន។
ជាក់ស្តែង កាលពីថ្ងៃទី៣០ ខែវិច្ឆិកាកន្លងទៅ នាយករដ្ឋមន្ត្រីអូស្ត្រាលីស្កុត ម៉ូរីសុន បានទាមទារឲ្យចិន សុំទោសជាផ្លូវការចំពោះការបង្ហោះសំណេរ និងរូបគំនូរទាហានអូស្ត្រាលីយកកាំបិតដាក់លើកកុមារអាហ្វហ្កានីស្ថានម្នាក់ នេះបើតាមការអះអាងពីលោក Zhao Lijian អ្នកនាំពាក្យក្រសួងការបរទេសចិន។ លោកZhao Lijian អះអាងទៀតថា ការបង្ហោះគំនូរបែបនេះ គឺជារឿងដែលគួរឲ្យខឹងសម្បារ មិនអាចរកហេតុផលអ្វីមកកែតម្រូវបាន និងជាការប្រមាថប្រជាជន និងកងទ័ពអូស្ត្រាលីផង ហើយទំនាក់ទំនងទ្វេភាគី នឹងកាន់តែយ៉ាប់យ៉ឺន។
លោក ម៉ូរីសុន ក៏ដូចជាទាមទារឲ្យក្រុមហ៊ុន Twitter លុបសារដែលបង្ហោះដោយលោក Zhao ផងដែរ។ ប៉ុន្តែបណ្តាញសង្គមមួយនេះមិនបានលុបចោលសារ និងរូបភាពដែលបានបង្ហោះនោះឡើយ ដោយគ្រាន់តែដាក់សញ្ញាសម្គាល់ថា គណនីរបស់លោក Zhao ជាគណនីមានទំនាក់ទំនងរដ្ឋាភិបាលចិន និងប្រាប់អ្នកប្រើប្រាស់ឲ្យប្រយ័ត្នប្រយែងមុននឹងចុចមើលរូបនោះ។
លោកស្រី Hua Chunying អ្នកនាំពាក្យមួយរូបផ្សេងទៀតនៃក្រសួងការបរទេសចិន ជាការឆ្លើយតបនឹងការទាមទារបស់អូស្ត្រាលី ក៏បានលើកឡើងក្នុងសន្និសីទសារព័តមានថ្ងៃដដែលថា៖ ភាគីអូស្ត្រាលីប្រតិកម្មខ្លាំងពេកចំពោះការបង្ហោះរបស់សហសេវិករបស់លោកស្រី។ មិនតែប៉ុណ្ណោះលោកស្រី ក៏ប្រាប់ឲ្យអូស្ត្រាលីពិចារណកំហុសខ្លួនឯង និងកែប្រែកំហុសនេះ។
លើសពីនេះទៅទៀត លោកស្រី Hua ថែមទាំងបានរិះគន់ទៀតថា អូស្ត្រាលីគួរណាស់តែអាម៉ាស់ចំពោះទង្វើកងទ័ពរបស់ខ្លួន ក៏ដូចជាសុំទោសជាផ្លូវការទៅកាន់ប្រជាជនអាហ្វហ្កានីស្ថាន។ លោកស្រី Hua អះអាងថា អំពើដែលប្រព្រឹត្តដោយទាហាមអូស្ត្រាលីគឺជារឿងគួរឲ្យរន្ធត់ និងស្រងាកចិត្ត។
ដោយឡែកជុំវិញករណីខាងលើនេះដែរ ឧត្តមសេនីយ៍ Angus Campbell អគ្គមេបញ្ជាការកងទ័ពអូស្ត្រាលី បាននិយាយសុំទោសជាសាធារណៈរួចមកហើយកាលពីថ្ងៃទី១៩ វិច្ឆិកា។ ចំណែកលោក ម៉ូរីសុន ក៏សុំទោសមេដឹកនាំអាហ្វហ្កានីស្ថានតាមទូរស័ព្ទរួចហើយដែរ។
អគ្គមេបញ្ជាការកងទ័ពអូស្ត្រាលី កាលពីថ្ងៃទី១៩ វិច្ឆិកាកន្លងទៅ ធ្លាប់អះអាងថា ទាហានខ្លួនចំនួន១៩រូប មានជាប់សង្ស័យក្នុងការសម្លាប់ដោយខុសច្បាប់ជនស៊ីវិល និងអ្នកទោសចំនួន៣៩នាក់នៅអាហ្វហ្កានីស្ថាន។ក្រោយការទទួលស្គាល់នេះ អូស្ត្រាលីបានចាប់ផ្តើមនីតិវិធីរដ្ឋបាល និងតុលាការក្នុងការកាត់ក្តីទាហានរបស់ខ្លួន ក៏ដូចជាបានបណ្តេញទាហាន១៣នាក់ចេញពីកងកម្លាំងរបស់ខ្លួន។
គួរបញ្ជាក់ថា ទំនាក់ទំនងរវាងអូស្ត្រាលី និងចិន ចាប់ផ្តើមអាប់អួរក្រោយពេលអូស្ត្រាលីចេញមុខទាមទារឲ្យអង្គការសុខភាពពិភពលោក(WHO) បើកការស៊ើបអង្កេតពីប្រភពនៃជំងឺកូវីដ-១៩ ដោយសង្ស័យថាមានប្រភពចេញមកពីចិន។ ចាប់តាំងពីពេលនោះមក ប្រទេសទាំង២ចាប់ផ្តើមប៉ះទង្គិចគ្នាលើបញ្ហាសិទ្ធិមនុស្ស ចោទគ្នារឿងចារកិច្ច ក៏ដូចជាបញ្ហាអ្នកកាសែត។ នៅពេលថ្មីៗនេះ ចិនបានដាក់ពន្ធចំនួន២១២ភាគរយបន្ថែមលើស្រារបស់អូស្ត្រាលីក៏ដូចជាកាត់បន្ថយការនាំចូលធ្យូងថ្មពីប្រទេសនេះផងដែរ៕ដោយ៖ស តារា
លោក Zhao Lijian អ្នកនាំពាក្យក្រសួងការបរទេស
លោកស្រី Hua Chunying អ្នកនាំពាក្យក្រសួងការបរទេសចិន
នាយករដ្ឋមន្ត្រីអូស្ត្រាលី លោក ស្កុត ម៉ូរីសុន
