សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល៖ ក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្តកណ្តាល សូមឆ្លើយតបជូនគណនីហ្វេសប៊ុកឈ្មោះ Ran Ran និង បក្សី ប្រយុទ្ធ ដែលបានសរសេរបញ្ចេញមតិ (Comment) ក្នុងហ្វេសប៊ុកផេក ស្នងការដ្ឋាននគរបាលខេត្តកណ្តាល កាលពីថ្ងៃទី០៣ ខែធ្នូ ឆ្នាំ២០២០ មានខ្លឹមសារថា «មានការលេងភ្នាល់ល្បែងស៊ីសង មាន់ជល់ តាម Video Online នៅភូមិព្រែករាំង១ សង្កាត់កំពង់សំណាញ់ និងម្តុំក្រោមស្ពានព្រែកសំរោង សង្កាត់តាខ្មៅ» ។
ក្រោយពីទទួលបានព័ត៌មានខាងលើភ្លាម ដោយមានការចង្អុលបង្ហាញពីក្រុមការងារព័ត៌មាន និងប្រតិកម្មរហ័ស នៃស្នងការដ្ឋាននគរបាលខេត្ត លោកអធិការនគរបាលក្រុងតាខ្មៅ បានចាត់ឱ្យលោកនាយប៉ុស្តិ៍នគរបាលរដ្ឋបាលកំពង់សំណាញ់ និងលោកនាយប៉ុស្តិ៍នគរបាលរដ្ឋបាលតាខ្មៅ ចុះស្រាវជ្រាវទីតាំងដែលប្រជាពលរដ្ឋបានរាយការណ៍ ។
ជាលទ្ធផល៖ នៅថ្ងៃទី០៤ ខែធ្នូ ឆ្នាំ២០២០ កម្លាំងប៉ុស្តិ៍នគរបាលរដ្ឋបាលកំពង់សំណាញ់ និងប៉ុស្តិ៍នគរបាលរដ្ឋបាលតាខ្មៅ បានចុះអប់រំ ណែនាំ និងធ្វើកិច្ចសន្យាម្ចាស់ហាងកាហ្វេចំនួន០២ទីតាំងខាងលើ ឱ្យបញ្ឈប់ការភ្នាល់ល្បែងស៊ីសងមាន់ជល់ តាមVideo Online និងល្បែងស៊ីសងគ្រប់ប្រភេទចាប់ពីថ្ងៃធ្វើកិច្ចសន្យានេះតទៅ ។
អាស្រ័យហេតុនេះ សូមសាធារណជន ដែលប្រើប្រាស់បណ្តាញសង្គមមេត្តាជ្រាប៕
ដោយ៖ សិលា
