សារព័ត៌មាន នគរវត្ត តែងតែនាំមុខគេជានិច្ច
ប្រធានាធិបតីកូរ៉េខាងត្បូងលោក មូន ជេអុីន(Moon Jae-in) នៅថ្ងៃទី១២ ខែធ្នូ ឆ្នាំ២០២០បានប្រកាសថា នឹងប្រើប្រាស់ កម្លាំង ទាំងអស់ដើម្បីទប់ស្កាត់ការឆ្លងរាលដាលកូវីដ-១៩។ កូរ៉េខាងត្បូងមានករណីឆ្លងកូវីដ-១៩កើនឡើងដល់ទៅ៩៥០នាក់ ក្នុងរយៈពេល២៤ម៉ោង។
ប្រធានាធិបតីមូន ចាត់ទុកការឆ្លងរាលដាលកូវីដ-១៩នាពេលនេះគឺជា ស្ថានភាពអាសន្ន។ លោក ក៏បានសុំទោស ដល់ពលរដ្ឋ ដែលមិនអាចទប់ស្កាត់ការឆ្លងកូវីដ-១៩ ទាន់ពេលវេលា បើទោះបីបានអនុវត្តច្បាប់គម្លាតសង្គមក្តី។
មេដឹកនាំកូរ៉េខាងត្បូងបានបង្ហោះលើបណ្តាញសង្គមTwitterថា«យើងចាត់ទុកការឆ្លងរាលដាលកូវីដ-១៩ លើកនេះជាស្ថានភាពអាសន្ន ហើយយើងនឹងខិតខំទប់ស្កាត់ក្នុងពេលដ៏ខ្លីបំផុត »
ប្រធានាធិបតីកូរ៉េខាងត្បូងបានលើកឡើងថា រដ្ឋាភិបាលមានគម្រោងបង្កើតទីតាំង ធ្វើតេស្ត កូវីដ-១៩នៅ១៥០កន្លែងផ្សេងគ្នាដែលមានពលរដ្ឋរស់នៅច្រើន ក្នុងនោះមាន ស្ថានីយ៍រថភ្លើងទីក្រុងសេអ៊ូលជាដើម។
គិតមកដល់ យប់ថ្ងៃទី១២ខែធ្នូ កូរ៉េខាងត្បូង មានចំនួនករណីឆ្លងកូវីដ-១៩ ជាង៤១ពាន់នាក់ និងស្លាប់ ៥៧៨នាក់ ៕
ដោយ៖ធី រីណា
