សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ត្រូវថយន្តកិនបែកក្បាលធ្លាយខួរស្លាប់ បន្ទាប់ជិះម៉ូតូមួយគ្រឿងត្រូវរថយន្តធុនធំមិនស្គាល់ស្លាកលេខ បើកមកបុកពីក្រោយរួចហើយកិនចំពីលើក្បាល។ ចំណែករថយន្តបង្កបានបង្កើនល្បឿនបើកទៅមុខបាត់ស្រមោល។
ហេតុការណ៍នេះ កើតឡើងកាលពីវេលាម៉ោង២និង៥០នាទីរំលងអធ្រាត្រឈានចូលថ្ងៃទី៧ ខែមករា ឆ្នាំ២០២១ ស្ថិតនៅតាមបណ្ដោយផ្លូវជាតិលេខ៣ ត្រង់ចំណុចកងពលតូច ៧០ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះដែលស្លាប់មានឈ្មោះ ខឿន ខាវ អាយុ២៣ឆ្នាំ មានស្រុកកំណើតនៅភូមិតាខ្មៅ ឃុំកន្សោងអក ស្រុកកំពង់ត្របែក ខេត្តព្រៃវែង។
ប្រភពព័ត៌មានពីកន្លែងកេីតហេតុបានឲ្យដឹងថា មុនពេលកើតគេឃើញរថយន្តធុនធំមួយគ្រឿង មិនចាំស្លាកលេខ បើកបរក្នុងទិសដៅពីជើងទៅត្បូងក្នុងល្បឿនលឿន ខណៈមកដល់ចំណុចកើតខាងលើ បានបុកម៉ូតូហុងដាឌ្រីម សេ១២៥ ស៊េរីឆ្នាំ២០២០ ពណ៌ខ្មៅ ពាក់ស្លាកលេខ ភ្នំពេញ 1IE-1696 ជិះដោយយុវជនម្នាក់ ពីក្រោយពេញទំហឹងនិងកិនចំក្បាលបែកធ្លាយខួរស្លាប់គួរឲ្យរន្ធត់បំផុត។ចំណែករថយន្តបង្កមិនបានឈប់ទទួលខុសត្រូវនោះទេ បានបន្ថែមល្បឿនបើករត់គេចបាត់ស្រមោល។
សមត្ថកិច្ចបានយកម៉ូតូទៅរក្សាទុកនៅអធិការដ្ឋាននគរបាលខណ្ឌរង់ចាំស្រាវជ្រាវរករថយន្តបង្កឲ្យចូលខ្លួនមកដោះស្រាយតាមផ្លូវច្បាប់៕ដោយ៖សុខាសែនជ័យ
