បាតុកម្មទូទាំងប្រទេសប្រេស៊ីល ទាមទារចោទប្រកាន់ទោសប្រធានាធិបតី ដោយសារតែបរាជ័យ ក្នុងការទប់ស្កាត់ជំងឺកូវីដ-១៩

ចែករំលែក៖

ពលរដ្ឋប្រេស៊ីលរាប់សិបពាន់នាក់បាននាំគ្នាធ្វើបាតុកម្មទាមទារចោទប្រកាន់ទោសប្រធានាធិបតីJair Bolsonaro ដោយសារតែមិនអាចទប់ស្កាត់ការឆ្លងរាលដាលជំងឺកូវីដ-១៩ បានល្អ ទុកឲ្យពលរដ្ឋជាច្រើនឆ្លងកូវីដ-១៩។
កាលពីថ្ងៃទី២៤ខែមករា ចំនួនអ្នកស្លាប់ដោយកូវីដ-១៩ ក្នុងប្រទេសនេះ កើនឡើងដល់ទៅ២១៦.០០០ នាក់។ បាតុកម្មធ្វើឡើងនៅរដ្ឋចំនួន២០ ក្នុងប្រទេសនេះ។ មេដឹកនាំបក្សប្រឆាំងលោក Guilherme Boulos បានថ្លែងថា «យើងសូមប្រកាសថា មិនអាចរង់ចំាដល់ឆ្នាំ២០២២ ដើម្បីបោះឆ្នោត ប្រធានាធិបតីថ្មីឡើយ។ ដើម្បីការពារអាយុជីវិតពលរដ្ឋ ពេលនេះយើងចាំបាច់ត្រូវតែដកតំណែងប្រធានាធិបតី Jair Bolsonaro ។
នៅព្រឹកថ្ងៃទី២៤ខែមករា មេដឹកនាំបក្សប្រឆាំងបានដង្ហែក្បួនទាមទារចោទប្រកាន់ទោសប្រធានាធិបតីJair Bolsonaro ។ នៅពេលនេះដែរមានពលរដ្ឋជិត២សែននាក់ បានចុះហត្ថលេខាលើលិខិតទាមទារចោទប្រកាន់ទោស ប្រធានាធិបតី ដោយសារតែមិនអាចទប់ស្កាត់កូវីដ-១៩ បានល្អ។
ការឆ្លងរាលដាលកូវីដ-១៩ បានធ្វើឲ្យពលរដ្ឋប្រេស៊ីលជាង១៥លាននាក់បាត់បង់ការងារធ្វើ ដោយសារតែការឆ្លងកូវីដ-១៩ ។ មកទល់ពេលនេះប្រេស៊ីលមានករណីឆ្លងកូវីដ-១៩ កើនឡើងដល់ទៅជាង ៨,៨លាននាក់ និងស្លាប់២១៧ ពាន់នាក់ ។
ការឆ្លងរាលដាលកូវីដ-១៩កើនឡើងខ្ពស់ដោយសារតែប្រធានាធិបតី Jair Bolsonaro ប្រឆាំងនឹងច្បាប់បិទប្រទេសទប់ស្កាត់កូវីដ-១៩ ។ មិនតែប៉ុណ្ណោះលោកក៏បានចូលរួមធ្វើបាតុកម្មប្រឆាំងច្បាប់បិទប្រទេសទៀតផង។ ទាំងនោះហើយទើបបណ្តាលឲ្យមានអ្នកឆ្លងច្រើនក្នុងប្រទេសនេះ៕ ដោយ៖ធី រីណា