សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍មួយបានកើតឡើងរវាងរថយន្តម៉ាកហ៊ីយ៉ាន់ដាយដែលបានបើកបត់ឆ្វេងដោយខ្វះការប្រុងប្រយ័ត្នទៅបុកជាមួយម៉ូតូដែលបើកបញ្ច្រាសទិសគ្នាពេញទំហឹងបណ្ដាលឱ្យរងរបួសធ្ងន់បង្កការភ្ញាក់ផ្អើលដល់អ្នកភូមិទាំងក្បាលព្រលប់។
ហេតុការណ៍នេះបានកើតឡើងកាលពីវេលាម៉ោង៦និង១៥នាទីព្រលប់ថ្ងៃទី០១ ខែកុម្ភៈ ឆ្នាំ២០២១ នៅលេីផ្លូវជាតិលេខ៣១៤D ចន្លោះបង្គោលគីឡូម៉ែត្រលេខ១៤-១៥ ស្ថិតក្នុងភូមិរោទ៍ឃុំញ ស្រុកកំពង់រោទ៍ ខេត្តស្វាយរៀង ។
សមត្ថកិច្ចនគរបាលស្រុកបានឱ្យដឹងថាអ្នករងរបួសមានឈ្មោះ ជួន ប៉ែត អាយុ ៣២ឆ្នាំ មុខរបរគ្រូបង្រៀន រស់នៅភូមិប្ញស្សីអម ឃុំញ ស្រុកកំពង់រោទ៍ ខេត្តស្វាយរៀង ។
ចំណែកអ្នកបើកបររថយន្តឈ្មោះ មោគ សាផន ភេទប្រុស អាយុ២៨ឆ្នាំ មុខរបរអ្នកបេីកបរ រស់នៅភូមិរោទ៍ ឃុំញ ស្រុកកំពង់រោទ៍ ខេត្តស្វាយរៀង ក្រោយបង្កហេតុបានរត់គេចខ្លួន ។
ប្រភពពីអ្នកភូមិបានឱ្យដឹងថា មុនកើតហេតុមានរថយន្តកូរ៉េម៉ាកហុីយ៉ាន់ដាយ ពណ៌ខៀវ ពាក់ស្លាកលេខ ឌ០៤២៣-ភ្នំពេញ២ បេីកបរក្នុងទិសដៅពីត្បូងទៅជេីង ហើយក៏បានបត់ឆ្វេងដោយខ្វះការប្រុងប្រយ័ត្នស្រាប់តែមានម៉ូតូមួយគ្រឿងម៉ាកស៊ុយហ្ស៊ុយគីនិច(Nex) ពណ៌ស ពាក់ស្លាកលេខ ស្វាយរៀង ១K-៩០៦៩ បេីកបរពីជេីងមកត្បូង ជាន់ហ្វ្រ័ងមិនទាន់ក៏បុកគ្នាពេញទំហឹងបង្កការភ្ញាក់ផ្អើលតែម្ដង។
ក្រោយកើតហេតុសមត្ថកិច្ចបានមកធ្វើអន្តរាគមន៍យកជនរងគ្រោះទៅកាន់មន្ទីរពេទ្យ និងវាស់វែងអូសយកវត្ថុតាងរថយន្តនិងម៉ូតូទៅរក្សាទុកនៅប៉ុស្តិ៍នគរបាលរដ្ឋបាលញ ដើម្បីដោះស្រាយតាមច្បាប់៕ យឹម សុថាន
