សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បាត់តំណែងជាម្ចាស់មកុដកញ្ញា Miss Grand Cambodia 2020 មែន ប៉ុន្តែពេលនេះដំណឹងនៃការគ្រងតំណែងជាតួឯកក្នុងភាពយន្តភាគថ្មីមួយបានធ្វើឲ្យអ្នកគាំទ្រនាងភ្ញាក់ផ្អើលជាខ្លាំង។ ការបញ្ជាក់នេះគឺមុនមួយថ្ងៃប៉ុណ្ណោះនៃប្រកាសផ្ទេរតំណែងម្ចាស់មកុដទៅឲ្យកញ្ញា លីវ ជីលីដែលជាបេក្ខនារីរងលំដាប់ទី២នោះ។
បើតាមការបង្ហោះនៅលើគណនីហ្វេសប៊ុកផ្លូវការរបស់តារាសម្តែង លោក សាវិន ហ្វីលីព បានបញ្ជាក់ថា ភាពយន្តភាគថ្មី រឿង “ បាបស្នេហ៍អតីត” នឹងធ្វើពិធីក្រុងពាលីនៅថ្ងៃស្អែកទី ០៣ កុម្ភៈ ២០២១ ម៉ោង៧ព្រឹកនៅផលិតកម្ម Ad Music ។ក្នុងសំណេរដដែលនេះបានបញ្ជាក់ដែរថា កញ្ញា សេង រដ្ឋា ទទួលបានតំណែងថ្មីជាតួឯកស្រី, ហើយលោកនឹងសម្ដែងជាឪពុករបស់លោក ឃឹម ហ្សានីត ដែលនឹងសម្ដែងជាតួឯកប្រុស។
តារារូបនេះបញ្ជាក់ផងដែរថានៅមានសិល្បករ ជាច្រើនទៀតចូលរួមសម្តែងក្នុងភាពយន្តភាគប្រមាណ៤៥ភាគ ហើយក្នុងនោះលោកក៏សម្តែងជាមួយតារាសម្តែងស្រីអ្នកនាង រតនា ដែលជាតួអង្គភរិយាលោកផងដែរ។
គេចាំបានដែរថា កញ្ញា សេង រដ្ឋា អតីត ម្ចាស់មង្កុដMiss Grand Cambodia 2020 បានសម្រេចចិត្តបោះបង់តំណែង និងយល់ព្រមឲ្យផលិតកម្មដកតំណែងជាកញ្ញ្ញាឯកក្រោយពីលេចចេញភាពចម្រូងចម្រាសមួយចំនួនជាមួយក្រុមហ៊ុន។ ទោះជាយ៉ាងណាប៉ុន្មានថ្ងៃមុនពេលនៃការប្រកាសដកតំណែងមកដល់ គេបានឃើញនាងបង្ហាញសមត្ថភាពសិល្បៈមួយចំនួន រួមទាំងការហ្វឹកហាត់ដើរបង្ហាញម៉ូត និងការគ្រងឈុតសម្លៀកបំពាក់ប្រណីតមួយចំនួនគួរឲ្យទាក់ទាញ។ ការលេចមុខក្នុងប្រវត្តិជាអ្នកសម្តែងលើកដំបូងនឹងក្លាយជារបត់ថ្មីសម្រាប់តារាស្រីរូបនេះលេចមុខក្នុងវិស័យសិល្បៈទី៧មួយនេះ ហើយក៏ជាការបើកផ្លូវបន្តទៅកាន់ភាពជោគជ័យ និងអាចបំពេញចិត្តអ្នកគាំទ្រនាងផងដែរទោះជាយ៉ាងណានេះគឺជាដំណឹងដ៏គួរឲ្យភ្ញាក់ផ្អើលសម្រាប់អ្នកគាំទ្រនាងអមដោយសារសាទរជាច្រើនចំពោះតំណែងថ្មីមិនគួរឲ្យជឿ និងជាអ្វីដែលអ្នកគាំទ្រនាងចង់បានព្រោះតែការរបូតតំណែងចេញទៅប្រកួតនៅក្រៅប្រទេសបានធ្វើឲ្យអ្នកគាំទ្រនាងជាច្រើនខកចិត្តខ្លាំងនោះ។ ស្នាដៃសម្តែងដំបូងក្នុងតំណែងតួឯកនេះក៏ត្រូវបានគេរំពឹងថានឹងជួយលើកមុខមាត់នាងក្នុងវិស័យសម្តែង បើទោះបីជាបទពិសោធន៍សម្តែងនាងនៅក្មេងខ្ចីក៏ដោយ ប៉ុន្តែជាឱកាសក្នុងការលើកមុខមាត់និងហ្វឹកហាត់សមត្ថភាពបន្ថែមលើវិស័យសិល្បៈមួយនេះហើយគេរំពឹងថានាងនិងទទួលបានការគាំទ្រច្រើនពីទស្សនិកជន៕
ដោយ៖វឌ្ឍនា
