សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនជាតិចិន២នាក់ស្រវឹងស្រាធ្លាក់ភ្លែកបើករថយន្តមួយគ្រឿងបោះពួយយ៉ាងលឿនបានជ្រុលទៅបុករថយន្តពីរគ្រឿងទៀតដែលកំពុងឈប់ភ្លើងស្តុបបណ្ដាលឲ្យរងការខូចខាត តែសំណាងល្អមិនមានអ្នករងរបួស។
ហេតុការណ៍នេះកើតឡើងកាលពីវេលាម៉ោង១២និង៤០នាទីរំលងអធ្រាត្រឈានចូលថ្ងៃព្រហស្បតិ៍ទី៤ខែកុម្ភៈ ឆ្នាំ២០២១ ស្ថិតនៅតាមបណ្ដោយផ្លូវព្រះសុធារសកែងនិឹងផ្លូវព្រះនរោត្ដម ក្នុងសង្កាត់ទន្លេបាសាក់ ខណ្ឌចំការមន។
យោងតាមប្រភពពីកន្លែងកើតហេតុបានឲ្យដឹងថា មុនពេលកើតហេតុ គេឃើញជនជាតិចិន២នាក់ក្នុងនោះមានម្នាក់បើករថយន្តស៊េរីទំនើបមួយគ្រឿងពណ៌ទឹកមាស ពាក់ស្លាកលេខព្រះសីហនុ2A 8531 ទាំងស្រវឹងស្រាជោកជាំបោះពួយយ៉ាងលឿន ខណៈមកដល់ចំណុចកើតហេតុខាងលើបានជ្រុលទៅបុករថយន្តឡិចសុីសLX470ដែលកំពុងតែឈប់ភ្លើងស្តុប ហើយរថយន្តឡិចសុីស470 ក៏ទៅបុកបន្តរថយន្តឡង់គ្រីស័រមួយគ្រឿងទៀតបណ្ដាលឲ្យរថយន្តទាំងបីគ្រឿងរងការខូចខាតដូចគ្នា។
ក្រោយកើតហេតុសមត្ថកិច្ចមូលដ្ឋានបានចុះមកដល់ចំណុចខាងលេី និងបានឃាត់ជនជាតិចិនដែលបង្កហេតុយកទៅប៉ុស្តិ៍នគរបាលទន្លេបាសាក់រង់ចាំប្រគល់ឲ្យជំនាញ ។ ដោយឡែករថយន្តទាំង៣គ្រឿងដែលរងការខូចខាតនេះក៏ត្រូវបានកម្លាំងការិយាល័យចរាចរណ៍ផ្លូវគោក នៃស្នងការដ្ឋានរាជធានីភ្នំពេញ ធ្វេីការវាស់វែងយកទៅរក្សាទុក រង់ចាំដោះស្រាយតាមច្បាប់ផងដែរ ៕ដោយ៖ភារ៉ា ដង្កោ
