សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ យុវជនម្នាក់ជាអ្នកដឹកអ៊ីវ៉ានតាមអនឡាញបានជិះម៉ូតូលឿនពេកមិនប្រយ័ត្ន ខណះមកដល់ផ្លូវបំបែកជាបួនជ្រុលទៅបុករថយន្តស៊េរីទំនើបចំបញ្ឆិតផ្នែកខាងមុខបណ្ដាលឲ្យដាច់ស្លាកលេខរថយន្តជាប់នឹងម៉ូតូរួចខ្ទាតទៅលើចិញ្ចើមផ្លូវរងរបួសធ្ងន់ កាលពីវេលាម៉ោង៩ និង២០នាទីយប់ថ្ងៃព្រហស្បតិ៍ ទី៨ ខែមេសា ឆ្នាំ២០២១ ស្ថិតនៅតាមបណ្ដោយផ្លូវលេខ៥១ កែងនិឹងផ្លូវលេខ១៣៦ សង្កាត់ផ្សារថ្មី ខណ្ឌដូនពេញ រាជធានីភ្នំពេញ ។
តាមប្រភពពីកន្លែងកើតហេតុបានឱ្យដឹងថា មុនពេលកើតហេតុគេឃើញយុវជនម្នាក់ជិះម៉ូតូមួយគ្រឿងម៉ាក វ៉េវ ពណ៌ខៀវ ពាក់ស្លាកលេខភ្នំពេញ1L -3995 ធ្វើដំណើរតាមបណ្ដោយផ្លូវលេខ៥១ ក្នុងទិសដៅពីជើងទៅត្បូងដោយប្រើល្បឿនលឿន និងខ្វះការប្រុងប្រយ័ត្នក៏ជ្រុលទៅបុករថយន្តស៊េរីទំនើបម៉ាកRANGE ROVER ពាក់ស្លាកលេខភ្នំពេញ2AD -6969 ដែលធ្វើដំណើរពីកើតទៅលិចចំបញ្ឆិតពីមុខពេញទំហឹងបណ្ដាលឲ្យខ្ទាតទៅលើចិញ្ចើមផ្លូវរងរបួសធ្ងន់ ភ្លាមៗនោះជនរងគ្រោះត្រូវបានរថយន្តសាមុយគ្លីនិកឯកជនដឹកយកទៅសង្គ្រោះជាបន្ទាន់ ។
ក្រោយកើតហេតុ សមត្ថកិច្ចមូលដ្ឋានបានសហការជាមួយសមត្ដកិច្ចជំនាញចរាចរណ៍ខណ្ឌចុះមកធ្វេីការវាស់វែងយករថយន្តនិងម៉ូតូទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ រង់ចាំដោះស្រាយគ្នាតាមក្រោយ ៕
ដោយ ៖ ភារ៉ា ដង្កោ
