សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ស្រវឹងបេីករថយន្តឡិចស៊ិសGS300កៀររ៉ឺម៉កលក់ដូងមួយគ្រឿងបណ្តាលឲ្យរងការខូចខាត នៅក្នុងបុរីឈូកវ៉ា១ ក្នុងសង្កាត់គោករការ ខណ្ឌព្រែកព្នៅ ហេីយមិនព្រមឈប់ទទួលខុសត្រូវក៏ព្យាយាមបេីករត់ក៏ជ្រុលបុកម៉ូតូមួយគ្រឿងទៀត រួចបន្តបេីករត់ទៀតរហូតទៅដល់វត្តពោធិ៍វ័ន ក្នុងសង្កាត់ស្នោរ ខណ្ឌកំបូល រាជធានីភ្នំពេញទេីបបែកកង់ម្ខាងរេចង្កូតធ្លាក់ប្រឡាយក៏ត្រូវប្រជាពលរដ្ឋនិងសន្តិសុខឃាត់បានភ្លាមៗតែម្តង កាលពីវេលាម៉ោង៥ល្ងាចថ្ងៃទី១០ ខែមេសា ឆ្នាំ២០២១។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនពេលកេីតហេតុគេបានឃេីញបុរសម្នាក់បេីករ៉ឺម៉កលក់ដូង កំពុងឈប់លក់ដូងឲ្យគេនៅក្នុងបុរីឈូកវ៉ា១ ភ្លាមនោះស្រាប់តែមានបុរសម្នាក់បេីករថយន្តឡិចស៊ិសGS 300 ពណ៌ស ពាក់ស្លាកលេខភ្នំពេញ2BH 1803 បេីកមកកៀររ៉ឺម៉កលក់ដូងបណ្តាលឲ្យរងការខូចខាតសំណាងមិនមានមនុស្សរងរបួសនោះទេ បន្ទាប់មករថយន្តបង្កមិនឈប់ទទួលខុសត្រូវនោះទេដោយព្យាយាមបេីករត់រហូតទៅដល់មហាវិថីឈ្នះឈ្នះ ក៏បន្តបុកម៉ូតូPCX មួយគ្រឿងទៀតបណ្តាលឲ្យមនុស្សម្នាក់រងរបួស។
សាក្សីបន្តទៀតថា បន្ទាប់មករថយន្តបង្កនៅតែមិនឈប់ទទួលកំហុស ហេីយព្យាយាមបេីករត់ រហូតទៅដល់របងវត្តពោធិ៍វ័ន សង្កាត់ស្នោរ ខណ្ឌកំបូល ទេីបបែកកង់ម្ខាងរេចង្កូតធ្លាក់ប្រឡាយក៏ត្រូវប្រជាពលរដ្ឋនិងសន្តិសុខឃាត់បានភ្លាមៗតែម្តង។
ក្រោយកេីតហេតុបុរសជាម្ចាស់រថយន្តបង្កត្រូវបានសន្តិសុខបុរីឈូកវ៉ា១ នាំខ្លួនយកទៅប៉ុស្តិ៍នគរបាលគោករការដេីម្បីប្រគល់ឲ្យជំនាញនៃស្នងការនគរបាលរាជធានីមកស្ទូចរថយន្តបង្កនិងយកម្ចាស់ទៅដោះស្រាយតាមច្បាប់៕
ដោយ៖សុខាសែនជ័យ
