សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តយីឌុបដឹកទូកុងតឺន័រមួយគ្រឿងបានក្រឡាប់ផ្ងារជើង ដោយសារតែអ្នកបើកបរខំបួងចង្គូតគេចពីរថយន្តមួយគ្រឿងទៀត ខណៈពេលកំពុងបត់ឆ្លងផ្លូវ។
ហេតុការណ៍នេះកើតឡើងកាលពីវេលាម៉ោង ១រសៀល ថ្ងៃទី១៦ ខែឧសភា ឆ្នាំ២០២១ ស្ថិតនៅតាមបណ្តោយផ្លូវ ថៃហ្គឺ កែងផ្លូវជាតិលេខ១ ក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ។
តាមប្រភពព័ត៌មាននៅកន្លែងកើតហេតុបានប្រាប់ឱ្យដឹងថា មុនពេលកើតហេតុគេបានឃើញ រថយន្តយីឌុបដឹកទូកុងតឺន័រមួយគ្រឿង ពាក់ស្លាកលេខ ភ្នំពេញ 3C-2347 បើកតាមបណ្តោយផ្លូវជាតិលេខ១ ក្នុងទិសដៅពីកើតទៅលិច ខណៈពេលមកដល់ចំណុចផ្លូវជាតិលេខ១ កែង ផ្លូវថៃហ្គឺ ដែលជាចំណុចកើតហេតុ រថយន្តក៏បានបត់ឆ្វេងឆ្ពោះទៅផ្លូវថៃហ្គឺ ពេលកំពុងបត់ស្រាប់តែមានរថយន្តមួយគ្រឿងទៀតមិនចាំម៉ាកនៅខាងមុខបណ្តាលឱ្យរថយន្តយីឌុបដឹកទូកុងតឺន័រ ជាន់ហ្វ្រ័ងមិនទាន់ ក៏បួងចង្គូតគេចរហូតក្រឡាប់ផ្ងារជើងនៅកន្លែងកើតហេតុតែម្តង បណ្តាលឱ្យរថយន្ត និង ទំនិញ ក្នុងរថយន្តខូចខាតអស់ជាច្រើន តែមិនបណ្តាលឱ្យនរណាម្នាក់រងរបួសក្នុងហេតុការណ៍នេះទេ ចំណែករថយន្តដែលនៅខាងមុខបានបន្តល្បឿនទៅមុខទៀតជាធម្មតា។
ក្រោយពេលកើតហេតុ កម្លាំងសមត្ថកិច្ចបានចុះមកដល់ចំណុចកើតហេតុរួចប្រគល់រថយន្តឱ្យម្ចាស់យកទៅជុសជុលដោយខ្លួនឯង ព្រោះមិនបង្កឱ្យមានគ្រោះថ្នាក់ និង ខូចទ្រព្យសម្បត្តិរដ្ឋក្នុងហេតុការណ៍នេះឡើយ៕
ដោយ៖ រ៉ារ៉ា
