សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ រដ្ឋាភិបាលថៃ បន្ទាប់ពីមានផែនការកាត់បន្ថយ ភាពណែនណាន់តាន់តាប់នៅតាមពន្ធនាគារដើម្បីប្រយុទ្ធប្រឆាំងនឹង COVID-19 ថ្មីៗនេះគម្រោងនឹងដោះលែងអ្នកទោសមួយចំនួននៅក្នុងប្រទេស ឱ្យនៅក្រៅឃុំជាបណ្ដោះអាសន្នឆាប់ៗនេះ។ ចំពោះការដោះលែងអ្នកទោសឱ្យនៅក្រៅឃុំជាបណ្ដោះអាសន្នខាងលើ កើតមានឡើងនៅចំពេលករណីឆ្លង COVID-19 នៅក្នុងចំណោមអ្នកទោសនៅតាម ពន្ធនាគារបានកើនឡើងគួរឱ្យបារម្ភផងដែរ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃពុធ ទី២៦ ខែឧសភា ឆ្នាំ២០២១។
បើតាមរដ្ឋមន្ត្រីយុត្តិធម៌ថៃ លោក Somsak Thepsuthin បានទទួលស្គាល់ថាចំនួនអ្នកទោសបច្ចុប្បន្នគឺវាលើសពីសមត្ថភាពផ្ទុករបស់ ពន្ធនាគារដែលតម្រូវឱ្យមានការពង្រីកទំហំឡើងវិញ។
លោករដ្ឋមន្ត្រីយុត្តិធម៌ថៃរូបនេះ បានគូសបញ្ជាក់ដូច្នេះថា៖ «អ្នកទោសដែលនឹងត្រូវដោះលែងឱ្យនៅក្រៅឃុំបណ្ដោះអាសន្ន ពួកគេត្រូវអនុវត្តការធ្វើចត្តាឡីស័កតាមស្ដង់ដារ ជាមុនសិន។ យើងនឹងមិនបណ្ដោយឱ្យអ្នកជំងឺ COVID-19 ចេញនោះទេ ហើយពួកគេនឹងត្រូវធ្វើតេស្ដនៅមុនពេលត្រូវដោះលែង។ ចំណែកការដោះលែងឱ្យនៅក្រៅឃុំបណ្ដោះអាសន្នទៀតសោត នឹងត្រូវធ្វើឡើងដោយភាពត្រឹមត្រូវយុត្តិធម៌»។
ដោយឡែកអាជ្ញាធរពន្ធនាគារថៃ ក៏បានបញ្ជាក់ដែរថា មានអ្នកទោសច្រើនជាង ៣១១,០០០នាក់ នៅតាមមណ្ឌលកែប្រែ ឬពន្ធនាគារចំនួន ១៤៣ នៅទូទាំងប្រទេស។
គួរបញ្ជាក់ថា បច្ចុប្បន្នរលកថ្មី នៃជំងឺCOVID-19 បានឆ្លងរាលដាលនៅតាមពន្ធនាគារជាច្រើននៅទូទាំងប្រទេសថៃ។ ខណៈមនុស្សច្រើនជាង ១០០,០០០នាក់ បានឆ្លងជំងឺកាចសាហាវមួយនេះ ចាប់តាំងពីខែមេសាមក ក្នុងនោះ៖ មានអ្នកទោស ១៨,០០០នាក់៕ដោយ៖ស តារា
