សារព័ត៌មាន នគរវត្ត តែងតែនាំមុខគេជានិច្ច
អន្តរជាតិ៖ បើតាមការបញ្ជាក់ពីមជ្ឈមណ្ឌលគ្រប់គ្រងជំងឺ COVID-19 នៃប្រទេសថៃ (CCSA) បានរាយការណ៍នៅថ្ងៃចន្ទ ទី៣១ ខែឧសភា ឆ្នាំ២០២១នេះ ស្តីពីការរកឃើញករណីឆ្លងជំងឺ COVID-19 ថ្មីៗ គិតត្រឹមរយៈពេល ២៤ម៉ោងចុងក្រោយនេះ មានចំនួន ៥,៤៨៥ករណីបន្ថែមទៀត។
ជាក់ស្ដែងសារព័ត៌មានថៃ Bangkok Post បានដកស្រង់ចេញផ្សាយពីរាយការណ៍របស់មជ្ឈមណ្ឌលគ្រប់គ្រងជំងឺ COVID-19 នៃប្រទេសថៃ បានគូសបញ្ជាក់យ៉ាងដូច្នេះថា៖ ក្នុងចំណោមករណីឆ្លងថ្មីៗខាងលើនេះ មានអ្នកឆ្លងចំនួន ៣,៥៣២ករណី ក្នុងចំណោមប្រជាជនទូទៅ និងចំនួន ១,៩៥៣ករណីទៀតជាករណីឆ្លង នៅតាមពន្ធនាគារ។
របាយការណ៍ដដែល បន្ដទៀតថា ក្រៅពីការរកឃើញករណីឆ្លងថ្មីៗខាងលើ អ្នកជំងឺចំនួន ១៩នាក់បន្ថែមទៀត ក៏ត្រូវបានរាយការណ៍ថាស្លាប់ នៅក្នុងរយៈពេល ២៤ម៉ោងកន្លងទៅដូចគ្នាដែរ។
បច្ចុប្បន្ន រហូតមកទល់ពេលនេះ បើគិតចាប់តាំងពីជំងឺ COVID-19 បានឆ្លងរីករាលដាលចូលមកដល់ជាលើកដំបូង កាលពីដើមឆ្នាំ២០២០កន្លងទៅ ប្រទេសថៃបានកត់ត្រានូវករណីឆ្លងជំងឺ COVID-19 សរុបនៅទូទាំងប្រទេស ១៥៩,៧៩២ករណី ក្នុងនោះមានអ្នកស្លាប់ ១,០៣១នាក់ និងអ្នកជាសះស្បើយ ១០៨,៣៤៥នាក់។
គួរបញ្ជាក់ថា ប្រទេសថៃ ដែលមានប្រជាជនសរុបជិត ៧០លាននាក់ សម្រាប់យុទ្ធនាការចាក់វ៉ាក់សាំងបង្ការ COVID-19 នេះ គិតត្រឹមថ្ងៃទី៣០ ខែឧសភា ឆ្នាំ២០២១ម្សិលមិញនេះ សម្រេចបានចំនួន ៣.៥៥លានដូសហើយ ក្នុងនោះប្រជាជន ២.៤៥លាននាក់បានចាក់ដូសដំបូង (ស្មើនឹង ៣.៥% នៃចំនួនប្រជាជនសរុប) និង ១.០៩លាននាក់ បានចាក់គ្រប់ដូស (១.៦% នៃចំនួនប្រជាជនសរុប)៕ដោយ៖ស តារា
