សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ជនសង្ស័យម្នាក់បានធ្វេីសកម្មភាពលួចយកទូរស័ព្ទរបស់ស្ត្រីម្នាក់បានសម្រេចខណៈដែលនាងកំពុងដេកលង់លក់ក្នុងបន្ទប់ជួលដោយមិនបានបិទទ្វារ ហេីយជនសង្ស័យព្យាយាមគេចខ្លួនតែត្រូវជនរងគ្រោះស្រែកឆោឡោឡេីងផ្អើលដល់អ្នកជិតខាងដេញចាប់បានប្រគល់ជូនសមត្ថកិច្ចកាលពីវេលាម៉ោង១១ព្រឹក ថ្ងៃទី២២ ខែមិថុនា ឆ្នាំ២០២១ នៅបន្ទប់ជួលលេខ១១ ជាន់ទី៣ ភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ។
ជនសង្ស័យឈ្មោះ អ៉ឹម ហេង ភេទប្រុសអាយុ៣០ឆ្នាំ មុខរបរមិនពិតប្រាកដ ស្នាក់នៅបន្ទប់ជួលក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ។
ចំណែកជនរងគ្រោះឈ្មោះអេង ស៉ីនន់ ភេទស្រី អាយុ៣៦ឆ្នាំ ស្នាក់នៅបន្ទប់ជួលលេខ១១ជាន់ទី៣ ក្នុងភូមិត្រពាំងថ្លឹង១ សង្កាត់ចោមចៅទី១ ខណ្ឌពោធិ៍សែនជ័យ។ ទូរស័ព្ទដែលជនសង្ស័យលួចនោះម៉ាកOppo។
តាមសម្តីជនរងគ្រោះបានឱ្យដឹងថា មុនពេលកេីតហេតុរូបគាត់បានសម្រាកនៅក្នុងបន្ទប់ដោយមិនបានចាក់គន្លឹះទ្វារទេ ហេីយទុកទូរស័ព្ទក្បែរខ្លួន។ ខណៈដែលម្ចាស់ទូរស័ព្ទកំពុងដេកលង់លក់ស្រាប់តែគាត់ឮសំឡេងមនុស្សដេីរពេលនោះគាត់ខំបេីកភ្នែកមេីលក៏ឃេីញជនសង្ស័យម្នាក់ដើរចូលមកនិងធ្វេីសកម្មភាពលួចយកទូរស័ព្ទរបស់គាត់ ហេីយដេីរចេញទៅ ភ្លាមនោះគាត់ក៏ងេីបហេីយស្រែឆោឡោឡេីងបង្កការភ្ញាក់ផ្អេីលដល់អ្នកជិតខាងជួយដេញឃាត់ខ្លួនបានតែម្តង រួចប្រគល់ជូនសមត្ថកិច្ច។
បច្ចុប្បន្នជនសង្ស័យត្រូវបានសមត្ថកិច្ចកសាងសំណុំរឿងបញ្ជូនទៅផ្នែកព្រហ្មទណ្ឌនៃអធិការដ្ឋាននគរបាលខណ្ឌពោធិ៍សែនជ័យដេីម្បីចាត់ការតាមច្បាប់៕
ដោយ៖សុខាសែនជ័យ
