សារព័ត៌មាន នគរវត្ត តែងតែនាំមុខគេជានិច្ច
ខេត្តបន្ទាយមានជ័យ៖ បើយោងតាមរដ្ឋបាលក្រុងសិរីសោភ័ណ បានបញ្ជាក់និងសម្រេចបិទខ្ទប់ រោងចក្រទឹកកក យីហោ សេះហោះ នៅផ្លូវជាតិលេខ៦ ភូមិមួយ សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ ក្រោយរកឃើញ វិជ្ជមានកូវីដ-១៩ លើកម្មករមួយចំនួន ។
អភិបាលក្រុងសិរីសោភ័ណលោក ហុឹល រ៉ាយ៉ា បានអោយដឹងថាៈ ការបិទខ្ទប់ ហើយតម្រូវអោយអ្នកពាក់ព័ន្ធទាំងអស់ត្រូវ ទៅយកសំណាកនោះ បានធ្វើឡើង កាលពីយប់ ថ្ងៃទី១ខែសីហា ។
ចំណែកលោកវេជ្ជបណ្ឌិត អ៊ាវ ដារ៉ាវុធ ប្រធានមន្ទីរពេទ្យបង្អែកក្រុងសិរីសោភ័ណ បានប្រាប់ឲ្យដឹង នាព្រឹកថ្ងៃទី២ ខែសីហា ឆ្នាំ២០២១ថាៈ កម្មករ នៅរោងសិប្បកម្មផលិតទឹកកក យីហោ សេះហោះនោះ កាលពីថ្ងៃទី១ ខែសីហា បានមកយកសំណាក នៅស្ថានីយ៍យកសំណាក សាលាបឋមសិក្សា ហ៊ុន សែន សូភី ហើយជាលទ្ធផលវិជ្ជមានកូវីដ-១៩ ចំនួន ៦ នាក់ ។
ដូច្នេះក្រុមគ្រូពេទ្យជួរមុខ នៃមន្ទីរពេទ្យ បានរាយការណ៍ ជូនរដ្ឋបាលក្រុង ហើយក៏តម្រូវអោយអ្នកពាក់ព័ន្ធ នៃសិប្បកម្មនោះ មកផ្តល់សំណាកបន្ថែម និងនៅព្រលប់ថ្ងៃដដែល ក៏ត្រូវបិទខ្ទប់សិប្បកម្មផលិតទឹកកក សេះហោះនោះ ហើយអ្នកអវិជ្ជមាន ត្រូវដាក់អោយធ្វើចត្តាឡីស័កផងដែរ៕
ដោយ៖អរុណរះ
