សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សមត្ថកិច្ចនគរបាលខណ្ឌឫស្សីកែវបានឃាត់ខ្លួនជនសង្ស័យម្នាក់ករណីលួចកាច់សោ.កម៉ូតូកាលពីម៉ោង១២និង៣០នាទីរសៀលថ្ងៃទី២៦ ខែសីហា ឆ្នាំ២០២១ នៅចំណុចផ្លូវបេតុងក្រុមទី៧ ភូមិផ្សារតូច សង្កាត់ទួលសង្កែ១ ខណ្ឌឫស្សីកែវ ។
លោកវរសេនីយ៍ឯក ហ៊ាង ថារ៉េត អធិការនគរបាលខណ្ឌឫស្សីកែវ បានឱ្យដឹងថា ជនរងគ្រោះជាម្ចាស់ម៉ូតូឈ្មោះនឿន រដ្ឋឆានៈ ភេទប្រុស អាយុ២០ឆ្នាំ មុខរបរនិសិ្សត មានទីលំនៅផ្ទះជួលក្នុងក្រុម៧ ភូមិផ្សារតូច សង្កាត់ទួលសង្កែ១ ខណ្ឌឫស្សីកែវ ។
ចំណែកជនសង្ស័យឈ្មោះឡុង សិលា ហៅវីត ភេទប្រុស អាយុ២១ឆ្នាំ មុខរបរមិនពិតប្រាកដ មានទីលំនៅផ្ទះជួលក្នុងភូមិបឹងកក់ សង្កាត់ស្រះចក ខណ្ឌដូនពេញ (មានសារធាតុញៀន) អវិជ្ជមានកូវីដ-១៩ ។
ចំពោះសម្ភារដកហូតមាន៖
១-ដែកសំប៉ែតចុងស្រួចចំនួន០១
២-សោខ្សៀលេខ៨ចំនួន០១
៣-ម៉ូតូ០១គ្រឿងម៉ាកហុងដាC125 ពណ៌ខ្មៅ(ស៊េរីឆ្នាំ២០១៧) ពាក់ស្លាកលេខភ្នំពេញ1GM-1154 (របស់ជនរងគ្រោះ ) ។
លោកអធិការខណ្ឌឫស្សីកែវ បានឱ្យដឹងទៀតថា នៅថ្ងៃ ខែ ឆ្នាំខាងលើជនរងគ្រោះបានទុកម៉ូតូនៅក្បែរបន្ទប់ជួលត្រង់ចំណុចកេីតហេតុខាងលេីរួចក៏ចូលសម្រាកក្នុងផ្ទះ ពេលនោះស្រាប់តែមានជនសង្ស័យម្នាក់បានដេីរមកដល់ចំណុចកេីតហេតុឃេីញម៉ូតូជនរងគ្រោះចតទុកនៅមុខបន្ទប់ជួល ហើយស្ងាត់ពុំមានមនុស្សក៏ធ្វេីសកម្មភាពលួចយក ដោយប្រើដែកសំប៉ែតចុងស្រួចកាច់បំបែកសោកុងតាក់ម៉ូតូបានហើយ ក៏ត្រូវម្ចាស់ផ្ទះជួលឃើញស្រែកថាចោរៗ ឮដល់កម្លាំងល្បាតក៏ធ្វើអន្តរាគមន៍ដេញចាប់រហូតឃាត់ខ្លួនជនសង្ស័យបាននាំយកមកប៉ុស្តិ៍ទួលសងែ្ក១ដើម្បីអនុវត្តតាមនីតិវិធី ។
បច្ចុប្បន្នជនសង្ស័យ និងវត្ថុតាងត្រូវបានឃាត់ខ្លួនបណ្តោះអាសន្ននៅអធិការដ្ឋាននគរបាលខណ្ឌឫស្សីកែវ ដើម្បីកសាងសំណុំរឿងបញ្ជូនទៅសាលាដំបូងរាជធានីភ្នំពេញចាត់ការបន្តតាមនីតិវិធី៕
ដោយ៖ជ្រោយពេជ្រ
