សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តកាមរីហាយប្រ៊ីដមួយគ្រឿងបេីកបរដោយបុរសម្នាក់ខ្វះការប្រុងប្រយ័ត្នបណ្ដាលឲ្យរេចង្កូតទៅបុកក្បាលថ្មពុះចែកទ្រូងផ្លូវយ៉ាងពេញទំហឹងបណ្ដាលឲ្យបាក់មួយកង់ ឯរថយន្តដាច់កាឡេកង់មុខខូចខាតធ្ងន់ធ្ងរ កាលពីវេលាម៉ោង៧យប់ថ្ងៃទី២២ ខែកញ្ញា ឆ្នាំ ២០២១ នៅចំណុចមុខវិទ្យាល័យ ជាស៊ីម សាមគ្គី តាមបណ្តោយផ្លូវលេខ២៧១ ក្នុងសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញ។
បេីតាមប្រភពព័ត៌មានពីកន្លែងកើតហេតុបានឱ្យដឹងថា មុនកើតហេតុគេឃើញបុរសម្នាក់បើករថយន្តកាមរីហាយប្រ៊ីដមួយគ្រឿង ពណ៌ទឹកប្រាក់ ពាក់ស្លាកលេខភ្នំពេញ2T-1752 ធ្វើដំណើរតាមបណ្តោយផ្លូវលេខ២៧១ក្នុងទិសដៅពីជើងទៅត្បូង។ លុះបើកមកដល់ចំណុចកើតហេតុខាងលើដែលផ្លូវកោងហើយបើកខ្វះការប្រុងប្រយ័ត្នក៏រេចង្កូតមកខាងឆ្វេងដៃជ្រុលទៅបុកក្បាលព្រួញថ្មពុះចែកទ្រូងផ្លូវពេញទំហឹងបណ្ដាលឲ្យបាក់អស់មួយកង់ រីឯរថយន្តបង្កបានរងការខូចខាតពីមុខចំហៀងខាងឆ្វេងព្រមទាំងដាច់កាឡេកង់មុខផងដែរ ។ ភ្លាមនោះម្ចាស់រថយន្តបង្កបានបើកទ្វាររត់គេចចេញពីកន្លែងកើតហេតុបាត់ទៅ។
ក្រោយកើតហេតុ សមត្ថកិច្ចមូលដ្ឋានបានចុះមកដល់និងបានទំនាក់ទំនងទៅសមត្ថកិច្ចជំនាញចុះមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៍ផ្លូវគោកនៃស្នងការដ្ឋាននគរបាលរាជធានីភ្នំពេញរង់ចាំម្ចាស់ចូលខ្លួនមកដោះស្រាយតាមច្បាប់៕
ដោយ ៖ ភារ៉ា ដង្កោ
