សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ ឪពុកនិងកូនប្រុសបានរងរបួសធ្ងន់ដោយសារគ្រោះថ្នាក់ចរាចរណ៍បើកម៉ូតូសណ្តោងរុឺម៉កខ្វះការប្រុងប្រយ័ត្នទៅបុកគូទរថយន្តកែច្នៃមួយគ្រឿងពីក្រោយពេញទំហឹងបង្កការភ្ញាក់ផ្អើលដល់អ្នកភូមិនិងសមត្ថកិច្ចចុះមកធ្វើអន្តរាគមន៍។
ហេតុការណ៍នេះបានកើតឡើងកាលពីវេលាម៉ោង៤និង៤០នាទីរសៀលថ្ងៃទី២៩ខែកញ្ញាឆ្នាំ២០២១លើផ្លូវជាតិលេខ១៣ក្រាលកៅស៊ូស្ថិតនៅចំណុចភូមិត្រពាំងរំដេញ ឃុំអង្គប្រស្រែ ស្រុករមាសហែក ខេត្តស្វាយរៀង។
សមត្ថកិច្ចនគរបាលស្រុកបានឱ្យដឹងថាឪពុកនិងកូនដែលរងរបួសមានឈ្មោះ ឃួន ចាន់ ភេទប្រុស អាយុ២៧ឆ្នាំ មុខរបរកសិករ និងឈ្មោះថន វិបុលកក្កដាអាយុ៣ឆ្នាំ រស់នៅភូមិត្រពាំងរំដេញ ឃុំអង្គប្រស្រែ ស្រុករមាសហែក ខេត្តស្វាយរៀង បើកម៉ូតូសណ្តោងរុឺម៉កម៉ាកវ៉េវ ពណ៌ក្រហម ពាក់ស្លាកលេខស្វាយរៀង១H-៩៤៦៤ខូចខាតយ៉ាងដំណំ។
ចំណែកអ្នកបើករថយន្តកែច្នៃត្រូវបានស្គាល់ឈ្មោះឃួន ប្រុស អាយុ៣៥ឆ្នាំ មុខរបរអ្នកបើកបរ រស់នៅភូមិថ្នា ឃុំថ្នាធ្នង់ ស្រុករំដួល ខេត្តស្វាយរៀង ក្រោយឃើញសភាពការណ៍មិនស្រួលបានរត់គេចខ្លួនបាត់ភ្លាមៗ។
តាមសាក្សីបានឱ្យដឹងថា មុនកើតហេតុមានបុរសម្នាក់បានបើករថយន្តកែច្នៃមួយគ្រឿង ពណ៌ត្រេអុី មិនមានពាក់ស្លាកលេខ ក្នុងពីទិសខាងត្បូងមកជើងលើផ្លូវជាតិលេខ១៣ក្រាលកៅស៊ូ ហើយក៏បានឈប់ចតប្របចិញ្ចើមផ្លូវដើម្បីចុះទៅទិញនំអន្សម។ ខណ:នោះស្រាប់តែមានម៉ូតូសណ្តោងរុឺម៉កម៉ាកវ៉េវ ពណ៌ក្រហម ពាក់ស្លាកលេខស្វាយរៀង១H-៩៤៦៤បើកស្របទិសគ្នាបានមកបុករថយន្តកែច្នៃដែលឈប់នោះពេញទំហឹងបង្កការភ្ញាក់ផ្អើលដល់អ្នកភូមិនិងសមត្ថកិច្ចតែម្ដង។
ក្រោយមក អ្នករងរបួសឪពុកនិងកូនត្រូវបានសមត្ថកិច្ចហៅរថយន្តសាមុយមកដឹកយកទៅកាន់មន្ទីរពេទ្យខេត្តដើម្បីសង្គ្រោះជីវិត។
ចំណែកវត្ថុតាងទាំង២គ្រឿងសមត្ថកិច្ចជំនាញធ្វើការវាស់វែងនិងអូសយកទៅរក្សាទុកនៅប៉ុស្តិ៍នគរបាលរដ្ឋបាលអង្គប្រស្រែដើម្បីដោះស្រាយពេលក្រោយតាមច្បាប់៕
ដោយ៖ យឹម សុថាន
