សារព័ត៌មាន នគរវត្ត តែងតែនាំមុខគេជានិច្ច
ខេត្តព្រះសីហនុ៖ ក្រោយពីកើតមានគ្រោះអគ្គិភ័យនៅភូមិកោះតូច សង្កាត់កោះរ៉ុងសន្លឹម ក្រុងកោះរ៉ុងមក នៅព្រឹកថ្ងៃ៧ ខែតុលា ឆ្នាំ២០២១ លោកគួច ចំរើន អភិបាលខេត្តព្រះសីហនុនិងជាប្រធានគណៈកម្មាធិការសាខាកាកបាទក្រហមខេត្តបានដឹកនាំមន្ត្រី អញ្ជើញសួរសុខទុក្ខនិងនាំយកជំនួយទៅឧបត្ថម្ភដល់គ្រួសាររងគ្រោះដោយអគ្គិភ័យនេះភ្លាមៗដែរ។
សូមបញ្ជាក់ថា អគ្គិភ័យនេះមានមនុស្សម្នាក់រងរបួស និងមានហាងលក់ដូរ២កន្លែងរងការខូចខាតទាំងស្រុង ព្រមទាំងផ្ទះពលរដ្ឋមួយចំនួនទៀតបានរងការខូចខាតផ្នែកខ្លះ។
តាមរបាយការណ៍ពីអាជ្ញាធរបានបញ្ជាក់ថា អគ្គិភ័យនេះបណ្តាលមកពីផ្ទុះធុងហ្គាសចេញពីផ្ទះឈ្មោះ ហាប់ សៀកលី ដែលជួលទៅឱ្យឈ្មោះ ប៊ុន ថន មុខរបរ លក់បាយ ហើយផ្ទះដែលអគ្គិភយ័ឆេះបំផ្លាញមានចំនួន៤ល្វែងដូចខាងក្រោម៖
១-ផ្ទះរបស់ហាប់ សៀកលី ឆេះអស់ពីរល្វែង ក្នុងនោះមួយល្វែងឆេះអស់ទាំងស្រុង និងមួយល្វែងទៀតឆេះអស់១០ភាគរយ(ត្រង់ដំបូលផ្ទះ) ដែលមានទំហំ ៥ម៉ែត្រ x២០ម៉ែត្រ សាងសង់អំពីដេីមឫស្សី ដំបូលប្រក់ស័ង្កសី និងហ្វុីប្រូសុីម៉ងត៍។
២-ផ្ទះរបស់ឈ្មោះ ឃួន កា ឆេះអស់ពីរល្វែង ក្នុងនោះមួយល្វែងឆេះអស់៦០ ភាគរយ ផ្នែកខាងជាន់លេី និងមួយល្វែងទៀតឆេះអស់១០ភាគរយ ដែលមានទំហំ ៥ម៉ែត្រ x២០ ម៉ែត្រសាងសង់អំពីឈេី ដំបូលប្រក់ស័ង្កសី និងមួយល្វែងទៀតប្រក់ហ្វុីប្រូសុីម៉ងត៍ ខូចខាតអស់១០ ភាគរយ(ត្រង់ដំបូលផ្ទះ) ចំណែកសម្ភារប្រេីប្រាស់ក្នុងផ្ទះខូចខាតទាំងស្រុង៕
ដោយ៖ឆ្លាម សមុទ្រ
