សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ ប្រទេសចិនបានបង្កើនថវិការចំនួន១០លានដុល្លារទៀតទៅក្នុងមូលនិធិកិច្ចសហការ អាស៊ាន-ចិន ជាពិសេសដើម្បីជំរុញការគាំទ្រដល់និស្សិតពីអាស៊ានទៅរៀននៅប្រទេសចិនសម្រាប់យុវជន។ នេះជាការប្រកាសរបស់នាយករដ្ឋមន្ត្រីនៃសាធារណរដ្ឋចិន លោក លី ខឹជាំង ក្នុងកិច្ចប្រជុំកំពូលអាស៊ាន-ចិននៅរសៀលនេះ។
ក្រៅពីបង្កើនថវិកាចំនួន១០លានដុល្លារបន្ថែម ប្រទេសចិនក៏បានប្រកាសកសាងសម្ព័ន្ធភាព និងការសហការលើវិស័យសុខាភិបាល ហើយនឹងបន្តពង្រឹង និងពង្រីកសមាហរណកម្មសេដ្ឋកិច្ចជាមួយអាស៊ាន ជាពិសេសលើកតម្កើងការអភិវឌ្ឍដើម្បីគាំទ្រគ្នាទៅវិញទៅមកក៏ដូចជាជំរុញកិច្ចសហការបៃតងផងដែរ។
ប្រទេសចិន និងអាស៊ាន បានបង្កើតភាពជាដៃគូសន្ទនាក្នុងឆ្នាំ១៩៩១ ក្នុងការកសាងភាពជាដៃគូរនេះប្រទេសចិនបានចាប់ផ្ដើមបង្កើតមូលនិធិសហប្រតិបត្តិការអាស៊ាន-ចិន (ACCF) ក្នុងឆ្នាំ១៩៩៧ ក្នុងគោលបំណងផ្តល់មូលនិធិដល់សកម្មភាពនានាក្នុងការជំរុញកិច្ចសហប្រតិបត្តិការរវាងអាស៊ាន និងចិនលើវិស័យ កសិកម្ម បច្ចេកវិទ្យាព័ត៌មានវិទ្យា ធនធានមនុស្ស ជួយគ្នាទៅវិញទៅមក និងការវិនិយោគពាណិជ្ជកម្ម ការអប់រំ ទំនាក់ទំនង បរិស្ថាន និងការដឹកជញ្ជូនជាដើម។ គិតរហូតមកដល់ពេលនេះតាមរយៈជំនួយសហប្រតិបត្តិការអាស៊ាន-ចិន អាស៊ានបានទទួលអភិវឌ្ឍន៍គម្រោងបានចំនួន២៨០គម្រោង៕
ដោយ៖សុខ ខេមរា
