សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ អកុសលណាស់ដែលបុរសម្នាក់បានស្លាប់និង២នាក់ទៀតរងរបួសធ្ងន់ ខណ:ជិះម៉ូតូលឿនមិនប្រុងប្រយ័ត្នជ្រុលទៅបុកដើមត្នោតមួយដើមដែលរលំដួលកាត់ទទឹងផ្លូវយ៉ាងពេញទំហឹង។
ឧបទ្ទវហេតុនេះកើតឡើងនៅរសៀលថ្ងៃទី១៧ ខែវិច្ឆិកា ឆ្នាំ២០២១ នៅលើផ្លូវក្រាលកៅស៊ូ ស្ថិតនៅភូមិវាលវង់ ឃុំស្នាអន្សា ស្រុកក្រគរ ខេត្តពោធិ៍សាត់ ។
ប្រភពពីមន្រ្តីនគរបាលស្រុកក្រគរបានឲ្យដឹងថា មុនពេលកើតហេតុមានម៉ូតូពីរគ្រឿង ទី១-ម៉ូតូម៉ាកហុងដា ឌ្រីមC.១២៥ ស៊េរី០១៥ ពណ៌ខ្មៅ ពាក់ស្លាកលេខពោធិ៍សាត់ 1F-4426 បើកបរដោយឈ្មោះ ឃុន និមឿន ភេទប្រុស អាយុ១៦ ឆ្នាំ ជនជាតិខ្មែរ រស់នៅភូមិបេង ឃុំស្នាអន្សា ស្រុកក្រគរ ខេត្តពោធិ៍សាត់ ស្លាប់នៅកន្លែងកើតហេតុ បើកបរក្នុងទិសដៅពីត្បូងទៅជើង ។
ចំណែកទី២-ម៉ូតូម៉ាកហុងដាឌ្រីមC.១២៥ស៊េរី០១៦ ពណ៌ខ្មៅ ពាក់ស្លាកលេខពោធិ៍សាត់ 1G-3069 បើកបរដោយ បុរសមិនស្គាល់អត្តសញ្ញាណ រងរបួសធ្ងន់ បើកបរក្នុងទិសដៅពីត្បូងទៅជើង។ ខណ:បើកមកដល់កន្លែងកើតហេតុខាងលើ ក៏បានបុកដើមត្នោត១ដើមដែលរលំកាត់ទទឹងផ្លូវ បណ្ដាលឲ្យមនុស្សម្នាក់បាក់កស្លាប់ និង០២នាក់រងរបួសធ្ងន់តែម្តង ។
ក្រោយកើតហេតុអ្នករងរបួសធ្ងន់ ត្រូវបានសមត្ថកិច្ច និងក្រុមគ្រូពេទ្យបញ្ជូនទៅសង្រ្គោះ នៅមន្ទីរពេទ្យបង្អែកខេត្តពោធិ៍សាត់ ឯសាកសពបានប្រគល់ឲ្យក្រុមគ្រួសារយកទៅធ្វើបុណ្យតាមប្រពៃណី។
សមត្ថកិច្ចជំនាញបានអះអាងថាករណីគ្រោះថ្នាក់ចរាចរណ៍នេះ បណ្ដាលមកពីកត្តាល្បឿន និងខ្វះការប្រុងប្រយ័ត្ន ។
រីឯម៉ូតូ០១គ្រឿង សមត្ថកិច្ចបានប្រគល់ឲ្យក្រុមគ្រួសារសព និងម៉ូតូ០១គ្រឿងទៀត សមត្ថកិច្ចយកមករក្សាទុក នៅប៉ុស្តិ៍នគរបាលរដ្ឋបាលស្នាអន្សាជាបណ្តោះអាសន្ន រង់ចាំក្រុមគ្រួសារមកទទួលយកទៅជួសជុលប្រើប្រាស់វិញ ៕
ដោយ ៖ ប្រាថ្នា
