សារព័ត៌មាន នគរវត្ត តែងតែនាំមុខគេជានិច្ច
ខេត្តបាត់ដំបង៖ ចោរផ្លោះរបងលួចយកម៉ូតូ ២គ្រឿង និងទ្រព្យសម្បត្តិមួយចំនួនទៀត ខណ:អាកាសធាតុត្រជាក់ម្ចាស់ផ្ទះសម្រាកលង់លក់។
ជនរងគ្រោះមានឈ្មោះទិត្យ សុផាត ភេទប្រុស អាយុ ៣២ឆ្នាំរស់នៅក្នុងភូមិបែកចានថ្មី សង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។ តាមសម្តីរបស់ជនរងគ្រោះបានបញ្ជាក់ថា ករណីចោរកម្មនេះបានកើតឡើងអំឡុងវេលាម៉ោង ៣៖០០នាទីរំលងអធ្រាត្រថ្ងៃទី ២៧ ខែវិច្ឆិកា ឆ្នាំ ២០២១ ស្ថិតក្នុងភូមិបែកចានថ្មីសង្កាត់ព្រែកព្រះស្ដេច ក្រុងបាត់ដំបង ខេត្តបាត់ដំបង។
សមត្ថកិច្ចនគរបាលក្រុងបាត់ដំបងបានឲ្យដឹងថា ករណីខាងលើជនរងគ្រោះបានបាត់ម៉ូតូចំនួន ០២គ្រឿងម៉ាក PCX ពណ៌ឈាមជ្រូកស៊េរីឆ្នាំ ២០១៨ ពាក់ស្លាកលេខ១Y-៥៩៨៦ និងមួយគ្រឿងទៀតម៉ាក CLick ពណ៌ស ស៊េរីឆ្នាំ ២០១៧ ពាក់ស្លាកលេខ១AC-៩៦៥៨ និងខ្សែដៃអង្កាំស្រោបមាស ០១ខ្សែ, ប្រាក់រៀល និងប្រាក់ដុល្លារមួយចំនួនទៀត។
តាមជនរងគ្រោះបានអះអាងដែរថា មុនពេលកើតហេតុជនមិនស្គាល់មុខបានធ្វើសកម្មភាពផ្លោះរបង រួចចូលទៅក្នុងផ្ទះដើររើ កកាយរកសោផ្ទះ ក៏ដូចជាសោទ្វាររបងខាងមុខផ្ទះ ហើយធ្វើសកម្មភាពលួចយកលុយ ខ្សែដៃ និងយកសោម៉ូតូដែលទុកលើតុ រួចចាក់សោម៉ូតូនិងសោរបងផ្ទះយកចេញដោយសុវត្ថិភាពតែម្ដង។ករណីដដែលនេះសមត្ថកិច្ចបានបង្ហើបបន្តថា ជុំវិញករណីលួចនេះកម្លាំងជំនាញបានកំណត់មុខសញ្ញាបានខ្លះៗហើយ សង្ស័យជាមុខសញ្ញាចាស់បច្ចុប្បន្នកំពុងធ្វើការស្រាវជ្រាវបន្ត៕
ដោយ៖ស សារ៉េត
