សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បេីយោងតាមប្រភពព័ត៌មានពីអគ្គនាយកដ្ឋានកិច្ចការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» បានឱ្យដឹងថា ដើម្បីបន្តការពារនូវសុខុមាលភាពជូនប្រជាពលរដ្ឋ ទប់ស្កាត់អំពើមិនសុចរិតក្នុងធុរកិច្ចពាណិជ្ជកម្ម និងការពារផលប្រយោជន៍ជូនអ្នកប្រើប្រាស់ នៅថ្ងៃទី០៧ ខែធ្នូ ឆ្នាំ២០២១ មន្រ្តីជំនាញ ក.ប.ប. សាខាខេត្តស្វាយរៀង ខេត្តស្ទឹងត្រែង ខេត្តរតនៈគិរី ខេត្តព្រះសីហនុ និងរាជធានីភ្នំពេញ បានបន្តចុះត្រួតពិនិត្យនូវទំនិញជាគ្រឿងឧបភោគ បរិភោគប្រើប្រាស់ដែលដាក់ចរាចរលក់នៅលើបណ្ដាទីផ្សារដែលស្ថិតនៅតាមបណ្ដាទីផ្សាររបស់ខ្លួន។
ជាក់ស្ដែងយោងទៅតាមលទ្ធផលនៃការចុះត្រួតពិនិត្យមន្រ្តីជំនាញបានរកឃើញនូវទំនិញខូចគុណភាព និងហួសកាលបរិច្ឆេទប្រើប្រាស់ចំនួន ៣៩១.២៨គីឡូក្រាម និងអាល់កុលក្លែងក្លាយ (មេតាណុល)ចំនួន ៤៧.៥លីត្រ។ ដោយឡែករាល់ទំនិញខាងលើត្រូវបានមន្រ្តីជំនាញធ្វើការដកហូតមករក្សាទុកដើម្បីចាត់ចែងតាមនីតិវិធី និងធ្វើការពិន័យអន្តរការណ៍ផងដែរ។
ជាមួយគ្នានេះ នៅថ្ងៃដដែលនោះ មន្ត្រីស៊ើបអង្កេត ក.ប.ប. ប្រចាំខេត្តតាកែវ ខេត្តព្រៃវែង និងរាជធានីភ្នំពេញ បានចុះត្រួតពិនិត្យតាមបណ្តាស្ថានីយ និហដេប៉ូ ប្រេងឥន្ធន: នានាដែលកំពុងប្រកបអាជីវកម្មក្នុងភូមិសាស្ត្រ ស្រុកត្រាំកក់ ខេត្តតាកែវ ស្រុកព្រះស្តេច និងស្រុកពាមជរ ខេត្តព្រៃវែង និងរាជធានីភ្នំពេញ។
យោងតាមលទ្ធផលនៃការត្រួតពិនិត្យ មន្រ្តីជំនាញបានរកឃេីញដេប៉ូចំនួន៨ បានលក់ប្រេងជូនអតិថិជនមានកម្រិតលំអៀងផ្នែកបរិមាណ និងដេប៉ូចំនួន៤ ដាក់លក់ប្រេងជូនអតិថិជនលេីសតម្លៃកំណត់របស់ក្រសួងពាណិជ្ជកម្ម។
ក្រោយប្រតិបត្តិការ មន្ត្រីជំនាញបានធ្វើការពិន័យអន្តរការណ៍ចំពោះម្ចាស់អាជីវកម្មដែលប្រព្រឹត្តល្មើស និងតម្រូវឱ្យធ្វេីកិច្ចសន្យាកែតម្រូវផងដែរ៕
ដោយ៖សហការី
