សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង ៖ លោក តូច ប៉ូលីវ៉ា អភិបាលរងខេត្តស្វាយរៀង ថ្លែងអំណរគុណ ចំពោះបងប្អូន ដែលជា កម្មករ របស់ក្រុមហ៊ុនទាំងអស់ នាពេលកន្លងមក បានជួយសំអាត ទាំងមុន និងក្រោយ ទីតាំង ដែលបានយកធ្វើជាមណ្ឌល ព្យាបាលជំងឺកូវីដ-១៩ កំរិតស្រាល។
ការថ្លែងបែបនេះធ្វើឡើងនារសៀលថ្ងៃទី១៦ខែធ្នូឆ្នាំ២០២១ក្នុងឱកាសលោក តូច ប៉ូលីវ៉ា អភិបាលរងខេត្តស្វាយរៀង ប្រធានផ្នែក ក្រៅប្រព័ន្ធ នៃក្រុមការងារបក្សខេត្ត តំណាងលោក ម៉ែន វិបុល អភិបាលខេត្ត អញ្ជើញចុះ សួរសុខទុក្ខ និងចែក អំណោយ ដល់បុគ្គលិក កម្មករ ក្រុមហ៊ុនហាយប្រ៊ីដ ហ្គាប៊ែដ ចំនួន ៧៥ នាក់ នៅក្រុងបាវិត ខេត្តស្វាយរៀង។
នាឱកាសនោះមានការចូលរួមពីលោក លឹម សៀងហេង អភិបាលក្រុងបាវិត លោក កើត សារឿន ប្រធានមន្ទីរបរិស្ថានខេត្ត និងលោក គីម ឡេង អគ្គនាយក ក្រុមហ៊ុន ហាយប្រ៊ីដ ហ្គាប៊ែដ និងសមត្ថកិច្ចដែលពាក់ព័ន្ធជាច្រើននាក់ផងដែរ។
លោក គីម ឡេង អគ្គនាយក ក្រុមហ៊ុន ហាយប្រ៊ីដ ហ្គាប៊ែដ បានឲ្យដឹងថាៈ ក្រុមហ៊ុន ហាយប្រ៊ីដ ហ្គាប៊ែដខូអិលម៏ ឌី បានបង្កើតឡើង នៅឆ្នាំ២០១៥ ដែលមានបុគ្គលិក បំរើការងារ ចំនួន ១០ នាក់ បច្ចុប្បន្ន ក្រុមហ៊ុន មានបុគ្គលិក ចំនួន ៧៥ នាក់ និងបានដំណើរការ ប្រតិបត្តិការ លើការប្រមូលសម្រាម នៅក្នុងក្រុងបាវិត ស្រុកចន្ទ្រា ខេត្តស្វាយរៀង និងស្រុកកំរៀង ខេត្តបាត់ដំបង ។
ដោយសារមើលឃើញពីការរីកចំរើន លើវិស័យឧស្សាហកម្ម មានការកើនឡើង ជាលំដាប់ និងដោយមានការយកចិត្តទុកដាក់ ចំពោះការងារកន្លងមក រួមទាំងការជួយ ជ្រោមជ្រែងពីសំណាក់ លោកប្រធានមន្ទីរបរិស្ថាន ផងដែរនោះ ក្រុមហ៊ុន ហាយប្រ៊ីដ ហ្គាប៊ែដ បានចុះបញ្ជីស្នើសុំអនុញ្ញាត បង្កើតទីលាន និង ប្រកបអាជីវកម្មដឹកជញ្ជូន សម្រាប់សេវាប្រមូល សំណល់ឧស្សាហកម្ម នៅខែធ្នូ ឆ្នាំ២០២០។
លោកបានបន្តទៀតថាៈ ក្រុមហ៊ុន មានទីតាំងចាក់សម្រាម ចំនួនពីរកន្លែង ទីតាំងទី១ មានផ្ទៃដីចំនួន ៤,៥ ហិកតា ស្ថិតនៅភូមិច្រកម្ទេស សង្កាត់បាវិត សម្រាប់សំណល់ សាធារណៈ និងទីតាំងទី២ មានផ្ទៃដីចំនួន ៦ ហិកតា ស្ថិតនៅភូមិធ្លក សង្កាត់ច្រកម្ទេស សម្រាប់សំណល់ឧស្សាហកម្ម។
ចំពោះដំណើរការប្រតិបត្តិការ ប្រមូលសម្រាមរបស់ ក្រុមហ៊ុន គឺតាមផ្លូវសាធារណៈ តាមខ្នងផ្ទះ មានចំនួន ៦០០ គ្រួសារ ព្រមទាំងទីតាំង ប្រកបអាជីវកម្ម មួយចំនួនទៀត មានដូចជា សណ្ឋាគារ កាស៊ីណូ ភោជនីយដ្ឋាន រោងចក្រ ក្នុងក្រុងបាវិត។
លោក តូច ប៉ូលីវ៉ា អភិបាលរងខេត្តស្វាយរៀងមានមតិសំណេះសំណាលដល់បងប្អូនដែលជាកម្មករ ប្រមូលសំរាមរបស់ ក្រុមហ៊ុន ហាយប្រ៊ីដ ហ្គាប៊ែដ ពិតជាមានសារៈសំខាន់ណាស់ ក្នុងការចូលរួមសម្អាត អនាម័យ នៅក្នុងក្រុងបាវិត ដែលធ្វើឲ្យបរិស្ថានល្អ និងលើកកម្ពស់មុខមាត់ក្រុងបាវិត ក៏ជាប្រទេសកម្ពុជាយើង ដែលមានភ្ញៀវទេសចរ ធ្វើដំណើរតាមក្រុងបាវិត ឆ្លងកាត់ទាំង ក្នុងខេត្ត ក្រៅខេត្ត។
លោកបន្តថា រដូវនេះ គឺជារដូវត្រជាក់ ហើយបងប្អូន កម្មករ ប្រមូលសំរាម នៅពេលព្រឹក ត្រូវចេះថែរក្សាសុខភាព ឲ្យបានល្អ ដើម្បីកុំឲ្យកើត ជំងឺផ្តាសាយ ជាពិសេស គឺការពារកុំឱ្យឆ្លងជម្ងឺកូវីដ-១៩ ឲ្យសោះ ពីព្រោះថា បើយើងឈឺ វានាំឲ្យខាតបង់ ទាំងពេលវេលា និងថវិកា ក្នុងការព្យាបាល។
សូមបញ្ជាក់ថាដើម្បីជាចំណងដៃសំរាប់ បុគ្គលិកក្រុមហ៊ុនចំនួន ៧៥ នាក់ ក្រុមការងារ ផ្នែកក្រៅប្រព័ន្ធ នៃក្រុមការងារបក្សខេត្ត បាននាំមកនូវឃីត អង្ករ និង ថវិកា មួយចំនួន យកមកចែកជូនយ៉ាងមានភាពស្និតស្នាលផងដែរ ៕
ដោយ៖ យឹម សុថាន
