សារព័ត៌មាន នគរវត្ត តែងតែនាំមុខគេជានិច្ច
ខ្សែប្រយុទ្ធសញ្ជាតិបារាំង Anthony Martial បានប្រាប់អ្នកចាត់ការបណ្តោះអាសន្នរបស់ក្លិបបិសាចក្រហម Manchester United លោក Ralf Rangnick ថា គាត់ចង់ចាកចេញពីក្រុមមួយនេះ។
លោក Rangnick បាននិយាយថា កីឡាកររូបនេះបាននិយាយពីអនាគតជាមួយក្លិបដែលមានបំណងចង់ចាកចេញកាលពីថ្ងៃពុធជាមួយបុរសអាយុ២៦ឆ្នាំដែលបានប្រាប់គាត់ថា “វាជាពេលវេលាត្រឹមត្រូវសម្រាប់ការផ្លាស់ប្តូរ”។
ខ្សែប្រយុទ្ធ Martial បានចាប់ផ្តើមការប្រកួតនៅ Premier League ត្រឹមតែ២ប្រកួតប៉ុណ្ណោះក្នុងរដូវកាលនេះ ដោយស៊ុតបញ្ចូលទីបាន១គ្រាប់។ ទោះបីជាគាត់ចង់ចាកចេញពី Old Trafford ក៏ដោយ លោក Rangnick បានបញ្ជាក់ថា ក្លិបមិនទាន់ទទួលបានការផ្តល់ជូនសម្រាប់ខ្សែប្រយុទ្ធនោះទេ។
ភ្នាក់ងាររបស់កីឡាករលោក Philippe Lamboley បានបញ្ជាក់កាលពីដើមខែនេះថា Martial ចង់ចាកចេញពីក្លិបក្នុងខែមករា ដោយគាត់បាននិយាយទៅកាន់ក្លិបនៅពេលនេះ។
ពាក់ព័ន្ធនឹងការចាកចេញនេះលោក Rangnick បានបន្ថែមថា “គាត់បានពន្យល់ខ្ញុំថាគាត់បាននៅ Manchester United អស់រយៈពេល៧ឆ្នាំចុងក្រោយនេះ ហើយគាត់មានអារម្មណ៍ថា វាជាពេលវេលាត្រឹមត្រូវសម្រាប់ការផ្លាស់ប្តូរ ដើម្បីទៅកន្លែងផ្សេង។ ខ្ញុំអាចធ្វើតាមគំនិតរបស់គាត់ ប៉ុន្តែម្យ៉ាងវិញទៀតវាក៏សំខាន់ផងដែរក្នុងការមើលស្ថានភាពរបស់ក្លិប។ យើងមានពេលវេលា មានការប្រកួតចំនួន៣ដែលយើងមាននៅក្នុងដៃ និងចង់ទទួលបានជោគជ័យតាមដែលយើងអាចធ្វើបាន។ មកទល់ពេលនេះ តាមខ្ញុំដឹងគឺមិនទាន់មានការផ្តល់ជូនពីក្លិបណាមួយឡើយ ហើយដរាបណាមិនទាន់មានគាត់នៅតែនៅក្នុងក្លិបរបស់យើងបន្ត”។
សូមបញ្ជាក់ថា Martial បានចុះហត្ថលេខាជាមួយ Manchester United ក្នុងឆ្នាំ២០១៥ពីក្លិប Monaco ក្នុងតម្លៃ៣៦លានផោនដែលធ្វើឲ្យគាត់ក្លាយជាកីឡាករបាល់ទាត់វ័យជំទង់ដែលមានតម្លៃថ្លៃជាងគេបំផុតរបស់ពិភពលោកនៅពេលនោះ។ កីឡាកររូបនេះស៊ុតបញ្ចូលទីបាន៧៩គ្រាប់ក្នុងការបង្ហាញខ្លួន២៦៨ប្រកួតសម្រាប់បិសាចក្រហម ប៉ុន្តែបានក្លាយជាកីឡាករបម្រុងបន្ទាប់ពីការមកដល់របស់ Cristiano Ronaldo, Edinson Cavani និង Jadon Sancho ។
ខ្សែប្រយុទ្ធរូបនេះមិនបានបង្ហាញខ្លួននៅក្នុងការប្រកួតណាមួយក្រោមការដឹកនាំរបស់គ្រូបង្វឹកបណ្តោះអាសន្នលោក Rangnick ដែលគ្រប់គ្រងមកទល់ពេលនេះនោះទេ ហើយបានបង្ហាញខ្លួនត្រឹមតែ១០ប្រកួតប៉ុណ្ណោះនៅក្នុងការប្រកួតទាំងអស់នៅរដូវកាលនេះ ៕
ដោយ៖ ភារៈ(រូបភាព ៖ BBC Sport)
