សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ នេះបេីយោងតាមប្រភពព័ត៍មានពីក្រសួងសាធារណការ និងដឹកជញ្ជូន នៅថ្ងៃសុក្រ ១២រោច ខែមិគសិរ ឆ្នាំឆ្លូវ ត្រីស័ក ព.ស ២៥៦៥ ត្រូវថ្ងៃទី៣១ ខែធ្នូ ឆ្នាំ២០២១នេះ បានឱ្យដឹងថា លោក ហេង រត្នពិសិដ្ឋ អគ្គនាយកនៃអគ្គនាយកដ្ឋានសាធារណការ តំណាងឯកឧត្តម សូរ វិច ទ័រ រដ្ឋលេខាធិការក្រសួងសាធារណការ និងដឹកជញ្ជូន និងជាប្រធានគណៈកម្មការត្រួតពិនិត្យការងារលទ្ធកម្ម កាលពីថ្ងៃទី៣០ ធ្នូម្សិលមិញនេះ នៅទីស្ដីការក្រសួង បានអញ្ជើញដឹកនាំកិច្ចប្រជុំបើកឯកសាជ្រើសរើសទីប្រឹក្សាបច្ចេកទេសសម្រាប់គម្រោងសាងសង់ផ្លូវវាងក្រុងសៀមរាប (EDCF Loan KHM-28) ដោយមានការអញ្ជើញចូលរួមពីថ្នាក់ដឹកនាំទទួលបន្ទុក តំណាងក្រសួងសេដ្ឋកិច្ច និងហិរញ្ញវត្ថុ គណៈកម្មការវាយតម្លៃទីប្រឹក្សាបច្ចេកទេស និងមន្ត្រីជំនាញបច្ចេកទេសក្រោមឱវាទក្រសួងផងដែរ។
ជាកិច្ចចាប់ផ្តើម លោកអគ្គនាយកប្រធានអង្គប្រជុំ បានប្រកាសសមាសភាពក្រុមហ៊ុនចូលរួមទាំងអស់មានចំនួន៧ ក្នុងចំណោមក្រុមហ៊ុនចំនួន១៤ ដែលក្រសួងបានអញ្ជើញឱ្យដាក់ពាក្យឱ្យចូលរួមដេញថ្លៃនៅមុនពេលបិទបញ្ចប់ការទទួលពាក្យចូលរួមដាក់ឯកសារ EOI ថ្លៃនៅថ្ងៃទី៣០ ខែធ្នូ ឆ្នាំ២០២១ វេលាម៉ោង៣ រសៀល។
សូមជម្រាបជូនថា៖ ក្រុមហ៊ុនចំនួន៧ ដែលបានចូលរួមផ្តល់ឯកសារ EOI នាឱកាសនោះរួមមាន៖ ១) Daehan Consultants Co., Ltd ២) Kunhwa Engineering & Consulting Co., Ltd ៣) Dasan Consultants Co., Ltd ៤) Dohwa Engineering Co., Ltd ៥) Dongsung Engineering Co., Ltd ៦) Yooshin Engineering Corporation និង ៧) Korea Consultants International Co., Ltd។
កិច្ចប្រជុំបើកឯកសាជ្រើសរើសទីប្រឹក្សាបច្ចេកទេសសម្រាប់គម្រោងសាងសង់ផ្លូវវាងក្រុងសៀមរាប(EDCF Loan KHM-28) នេះ បានបញ្ចប់នៅម៉ោង៤រសៀល នៅថ្ងៃដដែល ប្រកបដោយបរិយាកាសស្និទ្ធស្នាល៕
ដោយ៖សហការី
