សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ធំ ៖ ប្រភពព័ត៌មានពីពលរដ្ឋ និងអ្នករកស៊ីឈើ បានឲ្យដឹង នៅថ្ងៃទី៣១ខែធ្នូ ឆ្នាំ២០២១ នេះថា អ្នករកស៊ីឈើមួយក្រុមមិនដឹងជាអាងទឹកលុយឬអាងបក្ខពួកយ៉ាងណានោះទេបានជា “ប្រកាស” ជូនដំណឹងជាចំហរសុំផ្លូវដឹកឈើដោយសុំកុំរំខានពីសមត្ថកិច្ច ឬអ្នកកាសែតដោយអះអាងថា ខ្លួនបានបង់លុយឲ្យមន្ត្រីជំនាញរដ្ឋបាលព្រៃឈើ និងមន្ត្រីបរិស្ថាន ដែលគ្រប់គ្រង នៅតំបន់ ឬគោលដៅទទួលខុសត្រូវ ឆ្លងកាត់ នោះរួចស្រេចបាច់ ជាមុនហើយ ទើបហ៊ានដឹកចេញ។
ការប្រកាសក្តែងៗមិនខ្លាចរអារនេះហើយទើបគេឃើញមានក្បួនរទេះក្របី គោ គោយន្តកន្ត្រៃ រថយន្តច្នៃចូលដឹកឈើ នៅចំណុចព្រៃសហគមន៍ក្នុងស្រុកសន្ទុកដូចហែកឋិន ។
ចំពោះបទល្មើសដឹកជញ្ជូនឈើឈើមូលគគ្រឹកគគ្រេងយ៉ាងនេះត្រូវបាន មន្ដ្រីជំនាញតូចតាច បង្ហើបតបថា ពួកគាត់បានឃើញដែរ តែមិនហ៊ានមើលនិងមិនហ៊ានបង្រ្កាបឬបកស្រាយដូចម្តេចឡើយ ព្រោះខ្លាចឈ្មួញប្ដឹងទៅមេធំៗភ្ជាប់ទៅរឿងមិនប្រក្រតី ដែលនឹងនាំទុក្ខដាក់ខ្លួនឬមេស្តីបន្ទោសទៅវិញទេ។
មន្រ្តីជំនាញតូចតាចទាំងនោះបានលើកឧទាហរណ៍ជាក់ស្ដែង ថា នៅយប់ថ្ងៃទី២៩ ខែធ្នូ ឆ្នាំ២០២១ មានរទេះក្របី ចំនួន ប្រាំពីរគ្រឿង ដឹកឈើមូល ចេញពីព្រៃសហគមន៍ទំអរ ឆ្លងកាត់តាមច្រកអើយបាន នៅយ៉ាងស្រួល ដ្បិតមានអ្នករត់ការ ជិះម៉ូតូពីមុខក្បួន។ ពោលគឺ បានដឹកជញ្ជូនឈើ ឆ្លងកាត់ ភូមិសាស្ត្រ ទឹកដីស្រុកសន្ទុក ក្រោមដែនការគ្រប់គ្រង របស់លោក មុំ សុផល នាយផ្នែករដ្នបាលព្រៃឈើ កំពង់ថ្ម និងដែលជាថ្នាក់លើនៃ បី សង្កាត់រដ្ឋបាលព្រៃឈើ គឺសង្កាត់ក្រយា សង្កាត់តាំងក្រសាំង និងសង្កាត់បារាយណ៍។
ពាក់ព័ន្ធនឹងការដឹកជញ្ចូនអនុផល ព្រៃឈើ ខាងលើនេះ ភ្នាក់ងារកាសែតនគរវត្តមិនអាចសុំការទំនាក់ទំនងបំភ្លឺពី លោក មុំ សុផល នាយផ្នែករដ្ឋបាលព្រៃឈើ កំពង់ថ្មបានទេ កាលពីថ្ងៃទី៣១ ខែធ្នូ ។
ប៉ុន្តែលោក ប៊ុន សុធី នាយខណ្ឌរដ្ឋបាលព្រៃឈើកំពង់ធំវិញ បានត្រឹមនិយាយយ៉ាងខ្លីថា លោកនឹងឲ្យមន្ដ្រីរបស់លោក ចុះស្រាវជ្រាវមើល ថាតើបានឃើញ ឬមានករណីដឹកឈើ មែនឬអត់ទេ? ការនិយាយបែបយករួចខ្លួនយ៉ាងនេះបានន័យថា “ចប់”ហើយ លោកប្រធានអើយ៕
ដោយ៖ ប្រាថ្នា
