សារព័ត៌មាន នគរវត្ត តែងតែនាំមុខគេជានិច្ច
ខេត្តកណ្តាល ៖ ស្ត្រីជាប្រពន្ធម្នាក់រស់នៅជាមួយប្តីចេះតែរកាំរកូសមិនចុះសម្រុងនឹងគ្នា តែងតែរករឿងប្តី ជាហេតុធ្វើឱ្យបុរសជាប្តីមានការសង្ស័យក៏ដាក់ប្រព័ន្ធGPSក្នុងទូរស័ព្ទដៃរបស់ប្រពន្ធ ស្រាប់តែឃើញប្រពន្ធរបស់ខ្លួននៅជាមួយប្រុសសហាយក្នុងចម្ការស្វាយ ធ្វើឱ្យប្តីទ្រាំពុំបានក៏ប្តឹងសមត្ថកិច្ចឱ្យឃាត់ខ្លួនកាលពីម៉ោង១២និង៣០នាទីរសៀលថ្ងៃទី១៦ ខែមករា ឆ្នាំ២០២២ នៅក្នុងដីចម្ការស្វាយ ស្ថិតក្នុងភូមិបត់តាជី សង្កាត់ព្រែកហូរ ក្រុងតាខ្មៅ ខេត្តកណ្តាល តាមពាក្យបណ្ដឹងរបស់បុរសជាប្តីប្ដឹងអំពីការលួចផិតក្បត់មានសហាយស្មន់ ។
សមត្ថកិច្ចបានឱ្យដឹងថា ជនរងគ្រោះជាប្តី មានឈ្មោះ ឡុញ វណ្ណៈ អាយុ៥១ឆ្នាំ មានទីលំនៅភូមិត្នោតជ្រំ២ សង្កាត់បឹងទំពុន២ ខណ្ឌមានជ័យ រាជធានីភ្នំពេញ មុខរបរជាអាជីវករ ។ រីឯប្រពន្ធដែលរងការចោទលួចមានសហាយស្មន់ ឈ្មោះ សួន ពៅ អាយុ៤៣ឆ្នាំ មុខរបរសម្អាងការ ។ ចំណែកបុរសដែលលួចទាក់ទងប្រពន្ធគេមានឈ្មោះ អ៊ុំ ពន្លក អាយុ៤០ឆ្នាំ មុខរបរជាកសិករ ។
ប្រភពដដែលបន្តថា បុរសជាប្តីបានរៀបរាប់ថា រូបលោកជាបុរសពោះម៉ាយ មានកូន៣នាក់បានស្រលាញ់គ្នាជាមួយស្ត្រីមេម៉ាយឈ្មោះ សួន ពៅ នាងមិនមានកូននោះទេ ។ បន្ទាប់មកយើងទាំង២ក៏បានយល់ព្រមយកគ្នាជាប្តីប្រពន្ធដោយមិនបានរៀបការឬសែនព្រេនអ្វីឡើយ ប៉ុន្តែពួកយើងបានចុះសំបុត្រអាពាហ៍ពិពាហ៍ត្រឹមត្រូវតាមច្បាប់កាលពីថ្ងៃទី១៣ ខែធ្នូ ឆ្នាំ២០១០ ហើយរួមរស់ជាមួយគ្នា ទទួលបានកូនប្រុសម្នាក់ជាចំណងដៃ។ បុរសជាប្តីបានបន្តថា ក្នុងអំឡុងខែកក្កដា ឆ្នាំ២០២១ ពួកយើងចាប់ផ្ដើមរស់នៅមិនចុះសម្រុងនឹងគ្នា ចេះតែរកាំរកូស ហើយមួយរយៈចុងក្រោយនេះ បន្ទាប់ពីលោកបានទៅធ្វើការរកស៊ីបាត់ៗ ពេលត្រឡប់មកវិញ ប្រពន្ធហាក់ដូចជាសោះអង្គើយ ដែលគាត់សង្ស័យថាទំនងជាលួចមានអ្នកថ្មី និងចេះតែបង្កទំនាស់នៅក្នុងគ្រួសារ។
បុរសជាប្តីបន្តទៀតថា នៅមុនពេលកើតហេតុ លោកបានចាំឃ្លាំមើលស្ត្រីជាប្រពន្ធដោយបានដាក់ប្រព័ន្ធតាមដាន GPS តាមទូរស័ព្ទរបស់ប្រពន្ធគាត់ ក៏ឃើញលោតនៅចំណុចដីចម្ការស្វាយរបស់ឈ្មោះ អ៊ុំ ពន្លក ស្ថិតនៅភូមិបត្តាជី សង្កាត់ព្រែកហូរ ក្រុងតាខ្មៅ ខេត្តកណ្តាល ជាច្រើនលើកច្រើនសា ។ ឃើញដូច្នេះ លោកតាមដានទៅតាមប្រព័ន្ធ GPS ក៏បានឃើញប្រពន្ធកំពុងអង្គុយផឹកស្រាបៀរជាមួយសហាយស្មន់ឈ្មោះ អ៊ុំ ពន្លក នៅក្នុងដីចម្ការស្វាយ ទើបលោកប្ដឹងទៅសមត្ថកិច្ចក្រុងតាខ្មៅឱ្យចុះទៅឃាត់ខ្លួនអ្នកទាំង២តែម្ដង នៅវេលាម៉ោង១២និង៣០នាទីរសៀលថ្ងៃទី១៦ ខែមករា ។
នៅប៉ុស្តិ៍នគរបាល ប្រពន្ធបានទទួលស្គាល់ថា រូបនាងបានលួចមានទំនាក់ទំនងជាមួយប្រុសសហាយឈ្មោះ អ៊ុំ ពន្លក ចាប់តាំងពីខែសីហា ឆ្នាំ២០២១ ពិតប្រាកដមែន ដែលស្គាល់គ្នានិងទាក់ទងតាមទូរស័ព្ទ ហើយនាងសារភាពថា ធ្លាប់រួមភេទជាមួយគ្នាជាច្រើនលើកច្រើនសាក្នុងផ្ទះនៅដីចម្ការរបស់ប្រុសសហាយនេះតែម្ដង ។
ប្រពន្ធ និងប្រុសសហាយ កំពុងឃាត់ខ្លួននៅអធិការដ្ឋាននគរបាលក្រុងតាខ្មៅ ដើម្បីសាកសួរ និងចាត់វិធានការតាមផ្លូវច្បាប់ ៕
ដោយ៖ស្អាងជ័យ
