សារព័ត៌មាន នគរវត្ត តែងតែនាំមុខគេជានិច្ច
កីឡាករវាយតឺន្នីសលំដាប់ពិភពលោក Rafael Nadal បានបន្តការចាប់ផ្តើមដ៏គួរឱ្យភ្ញាក់ផ្អើលរបស់គាត់ក្នុងឆ្នាំ២០២២នេះដោយបានផ្តួលកីឡាករលំដាប់លេខ១ពិភពលោក Daniil Medvedev ឡើងវគ្គផ្តាច់ព្រ័ត្រMexican Open ដោយនឹងត្រូវប៉ះកីឡាករ Cameron Norrie របស់ចក្រភពអង់គ្លេស។
កីឡាករអេស្ប៉ាញ Nadal ធ្លាប់បានយកឈ្នះ Medvedev ក្នុងវគ្គផ្តាច់ព្រ័ត្រ Australian Open កាលពីខែមុនបានឈ្នះលើកីឡាកររុស្ស៊ីក្នុងលទ្ធផល ៦-៣ ៦-៣។
ចំណែកកីឡាករ Norrie វ័យ២៦ឆ្នាំបានឈានដល់វគ្គផ្តាច់ព្រ័ត្រជាមួយនឹងជ័យជម្នះក្នុងលទ្ធផល ៦-៤ ៦-៤ លើកីឡាករលេខ៤ពិភពលោក StefanosTsitsipas របស់ប្រទេសក្រិក។ Norrie បានឈ្នះ៨ប្រកួតជាប់ៗគ្នា បន្ទាប់ពីលើកពានកម្មវិធី Delray Beach ។
កីឡាករសញ្ជាតិអង់គ្លេសដែលជាប់ចំណាត់ថ្នាក់ទី១២លើពិភពលោករូបនេះបានឈ្នះពានរង្វាន់ ATP Tour ជាលើកទី៣នៃអាជីពរបស់គាត់នៅរដ្ឋ Florida កាលពីថ្ងៃអាទិត្យមុន ហើយឥឡូវនេះមានឱកាសដើម្បីដណ្តើមជើងឯកម្តងទៀតជាមួយកីឡាករ Nadal ដែលការប្រកួតវគ្គផ្តាច់ព្រ័ត្រធ្វើឡើងនៅថ្ងៃអាទិត្យនេះ។
កីឡាករ Nadal វ័យ៣៥ឆ្នាំបានរួចផុតពីការវាយបកក្នុងសិតទី២ពីកីឡាករMedvedev ដែលនឹងយកឈ្នះ Novak Djokovic នៅលើកំពូលតារាងពិភពលោកនៅថ្ងៃចន្ទ។ បន្ទាប់ពីឈុតបើកឆាកដ៏សាមញ្ញមួយ កីឡាករសញ្ជាតិអេស្ប៉ាញរូបនេះទទួលបាន១១ពិន្ទុនៅក្នុងការប្រកួត២ជាប់ៗគ្នាក្នុងសិតទី២ មុនពេលទទួលបានជ័យជំនះ។
កីឡាករអេស្ប៉ាញរូបនេះបានឈ្នះការប្រកួតបើកឆាកចំនួន១៤លើករបស់គាត់ក្នុងឆ្នាំ២០២២ ដោយកត់ត្រានូវការចាប់ផ្តើមរដូវកាលដ៏ល្អបំផុតក្នុងអាជីពរបស់គាត់។ គាត់ក៏ធ្លាប់ផ្តួល Medvedev វ័យ២៦ឆ្នាំក្នុងវគ្គផ្តាច់ព្រ័ត្រទីក្រុង Melbourne កាលពី៤សប្តាហ៍មុន ។
គូរប្រកួតវគ្គផ្តាច់ព្រ័ត្រកីឡាករ Norrie កំពុងមានបំណងចង់បានជ័យជម្នះលើកដំបូងក្នុងអាជីពរបស់គាត់ទល់នឹងម្ចាស់ជើងឯក Grand Slam ២១សម័យ Nadal ដែលបានយកឈ្នះកីឡាករអង់គ្លេសក្នុងព្រឹត្តិការណ៍ Australian Open, Barcelona Open និង French Open កាលពីឆ្នាំមុន ៕
ដោយ៖ ភារៈ(រូបភាព ៖ BBC Sport)
