សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ៖ ស្ត្រីម្នាក់ដែលត្រូវអតីតប្តីជះទឹកអាស៊ីតបណ្តាលឱ្យរលាករលួយពេញខ្លួនរងរបួសធ្ងន់នោះ ពេលនេះគាត់បានស្លាប់ហេីយកាលពីព្រឹកថ្ងៃទី២៤ ខែមីនា ឆ្នាំ២០២២នេះ ខណៈដែលប្តីចិត្តឃោរឃៅសមត្ថកិច្ចមិនទាន់ចាប់បាននៅឡេីយទេ។
សូមបញ្ជាក់ថា ករណីខាងលេីបានកេីតឡេីងកាលពីវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១៦ ខែមីនា ឆ្នាំ២០២២ នៅភូមិជំពូព្រឹក្ស ឃុំចំប៉ា ស្រុកព្រៃកប្បាស ខេត្តតាកែវ។
ជនដៃដល់ឈ្មោះខាយ ទ្រី ហៅឌឹក ភេទប្រុស អាយុ៣៩ឆ្នាំ ។ ចំណែកជនរងគ្រោះឈ្មោះទឹម សុខឃីម អាយុ ៤៣ឆ្នាំ រស់នៅភូមិជំពូព្រឹក្ស ឃុំចំប៉ា ស្រុកព្រៃកប្បាស ខេត្តតាកែវ។
តាមការរៀបរាប់របស់បងប្អូនជនរងគ្រោះបានឱ្យដឹងថា ជនដៃដល់និងជនរងគ្រោះជាអតីតប្តីប្រពន្ធនឹងគ្នា បាន រៀបការអស់រយៈពេលជាង២០ឆ្នាំមកហេីយ និងមានកូនប្រុសស្រី២នាក់ជាចំណងដៃ ។ ដោយសារតែរស់នៅមិនចុះសម្រុងនឹងគ្នាក៏បានលែងលះគ្នាអស់រយៈពេល៥ខែមកហេីយ ក្រោយមកបុរសជាប្តីបានសុំប្រពន្ធត្រូវគ្នាវិញ តែជនរងគ្រោះមិនព្រម។
សាក្សីបានបន្តថា លុះមកដល់យប់ថ្ងៃកេីតហេតុជនដៃដល់បានមកផ្ទះជនរងគ្រោះ ហើយដោយសារតែយប់ជ្រៅទៅហេីយជនរងគ្រោះក៏បានឃាត់ឲ្យសម្រាកនៅផ្ទះមួយយប់សិន ដោយជនដៃដល់ដេកខាងលេីផ្ទះ ចំណែកជនរងគ្រោះរួមទាំងកូនប្រុសស្រី២នាក់ទៀតដេកនៅខាងក្រោម។ ខណៈកំពុងលង់លក់ក្នុងដំណេកស្រាប់តែជនដៃដល់ជះទឹកអាស៊ីតមកពីលេីបណ្តាលឲ្យរលាកទាំងម្តាយនិងកូនរងរបួសធ្ងន់ ភ្លាមនោះជនដៃដល់ក៏បានគេចខ្លួនបាត់។
រហូតមកដល់វេលាម៉ោង៥ព្រឹក ថ្ងៃទី២៤ ខែមីនា ឆ្នាំ២០២២នេះជនរងគ្រោះក៏បានស្លាប់តែម្តង។
ពេលនេះក្រុមគ្រួសារកំពុងរៀបចំធ្វេីបុណ្យតាមប្រពៃណីនៅស្រុកកំណេីត ។
ក្រុមគ្រួសារសពសំណូមពរដល់សមត្ថកិច្ចមេត្តាស្រាវជ្រាវតាមចាប់ជនដៃដល់យកដាក់ទោសតាមផ្លូវច្បាប់ឱ្យខាងតែបានដេីម្បីជួយរកយុត្តិធម៌ជូនជនរងគ្រោះ៕
ដោយ៖សុខាសែនជ័យ
