សារព័ត៌មាន នគរវត្ត តែងតែនាំមុខគេជានិច្ច
ក្រុម Villarreal នឹងធ្វើដំណើរទៅជួបក្រុមខ្លាំងរបស់អង់គ្លេស Liverpool នៅកីឡដ្ឋាន Anfield នៅរាត្រីថ្ងៃពុធ សម្រាប់ការប្រកួតជើងទី១នៃពានរង្វាន់ UEFA Champions League វគ្គពាក់កណ្តាលផ្តាច់ព្រ័ត្ររបស់ពួកគេ។
Liverpool បានឈ្នះការប្រកួត Champions League ចុងក្រោយរបស់ពួកគេ ដោយបានយកឈ្នះក្រុម Benfica ក្នុងលទ្ធផលសរុប ៦-៤ សរុបក្នុងវគ្គ១/៤ផ្តាច់ព្រ័ត្រ បន្ទាប់ពីទទួលបានជ័យជំនះ ៣-១ ក្នុងជើងទី១ និងបានលេងស្មើ ៣-៣ ក្នុងការប្រកួតត្រឡប់មកវិញក្នុងទឹកដី។ ក្រុមហង្សក្រហម Liverpool មិនស្គាល់ចាញ់សោះក្នុងការប្រកួត១០លើកចុងក្រោយក្នុងការប្រកួតគ្រប់ពេលទាំងអស់ (ឈ្នះ៨ និងស្មើ២)។
ចំណែកក្រុម Villarreal បានឈ្នះការប្រកួត Champions League ចុងក្រោយ ដោយបានយកឈ្នះលើក្រុម Bayern München ក្នុងលទ្ធផលសរុប ២-១ ទាំងពីរជើងក្នុងវគ្គ១/៤ផ្តាច់ព្រ័ត្រ បន្ទាប់ពីទទួលបានជ័យជំនះ១-០ ក្នុងជើងទី១ក្នុងទឹកដី និងលេងស្មើ ១-១ នៅក្រៅទឹកដី។ ក្រុមឡើងជើង Villarreal មិនស្គាល់ចាញ់សោះក្នុងការប្រកួត៥លើកចុងក្រោយរបស់ពួកគេក្នុងការប្រកួតទាំងអស់ (ឈ្នះ៣ និងស្មើ២) ។
Liverpool បានឈ្នះការជួបគ្នាចុងក្រោយក្នុងការប្រកួតជាមួយក្រុម Villarreal ដោយទទួលបានជ័យជំនះ ៣-០ ក្នុងការប្រកួតវគ្គពាក់កណ្តាលផ្តាច់ព្រ័ត្រ Europa League នៅកីឡដ្ឋាន Anfield កាលពីខែឧសភា ឆ្នាំ២០១៦។ ពេលនោះកីឡាករ Daniel Sturridge បានស៊ុតបញ្ចូលទីគ្រាប់ដំបូងសម្រាប់ក្រុមហង្សក្រហមនៅនាទី៦៣ និងAdam Lallana ក៏រកបានគ្រាប់បាល់ក្នុងពេលនោះដែរ។
ក្នុងការប្រយុទ្ធ Mohamed Salah គឺជាកីឡាករសំខាន់សម្រាប់ Liverpool ក្នុងការប្រកួត Champions League។ គាត់គឺជាអ្នកស៊ុតបញ្ចូលទីនាំមុខគេរបស់ក្លិបជាមួយនឹងការស៊ុតបញ្ចូលទីចំនួន៨គ្រាប់ ដែលជាចំនួនខ្ពស់បំផុតទី៤ក្នុងចំណោមអ្នកស៊ុតបញ្ចូលទីច្រើនជាងគេក្នុងការប្រកួតក្នុងឆ្នាំ២០២១-២០២២នេះ។ រីឯកីឡាករ Arnaut Danjuma គឺជាអ្នកស៊ុតបញ្ចូលទីចំនួន៦គ្រាប់ក្នុងយុទ្ធនាការ Champions League រួមទាំងគ្រាប់បាល់បើកឆាកចំនួន២គ្រាប់ឲ្យក្រុម Villarreal។ ក្រុមភ្ញៀវបានស៊ុតបាល់បញ្ចូលទីក្នុងការប្រកួត Champions League ៥លើកជាប់គ្នាក្នុងរដូវកាលនេះដែលបានឈ្នះរហូតចាប់តាំងពីចាញ់ក្នុងវគ្គចែកពូលទល់នឹង Manchester United។
ក្រុមម្ចាស់ផ្ទះ Liverpool មានភាពស្វិតស្វាញក្នុងការយកឈ្នះលើទឹកដីខ្លួនឯងក្នុងរដូវកាល Champions League រដូវកាលនេះ ដោយឈ្នះ៣លើក ស្មើ១លើក និងចាញ់តែ១លើកក្នុងការប្រកួតចំនួន៥។ ហង្សក្រហមនឹងត្រូវការប្រកួតមិនដែលចាញ់ក្នុងផ្ទះចំនួន៤ប្រកួត (ឈ្នះ៣ ស្មើ១) ក្នុងគ្រប់ការប្រកួតទាំងអស់ ខណៈដែល Villarreal មានកំណត់ត្រាក្រៅដីដ៏ល្អមួយក្នុងការប្រកួតនៅរដូវកាលនេះដោយឈ្នះ៣ ស្មើ១ និងចាញ់១។
ក្នុងការប្រកួត៦លើកចុងក្រោយគ្រប់ការប្រកួតទាំងអស់ Liverpool ឈ្នះ៤ និងស្មើ២ ស៊ុតបាល់បញ្ចូលទី១៧គ្រាប់ និងរបូតវិញ៨គ្រាប់។ គ្រាប់បាល់ភាគច្រើនរបស់ក្រុមនេះគឺមាន៩គ្រាប់បានកើតឡើងនៅក្នុងតង់ទី១។ ចំណែកក្រុម Villarreal ឈ្នះ៣ ស្មើ២ និងចាញ់១ ក្នុង៦ប្រកួតចុងក្រោយរបស់ពួកគេ ស៊ុតបាល់បញ្ចូលទី៧គ្រាប់ និងរបូតវិញ៥គ្រាប់ ដែលគ្រាប់បាល់ភាគច្រើនរបស់ក្រុមនេះគឺមាន៥គ្រាប់បានកើតឡើងនៅក្នុងតង់ទី១។
ប្រវត្តិជួបគ្នា២ប្រកួតរបស់ក្រុមទាំង២គឺនៅខែមេសា ឆ្នាំ២០១៦ Villarreal យកឈ្នះ១ទល់០ក្នុងទឹកដីរបស់ខ្លួន និងនៅខែឧសភា ឆ្នាំ២០១៦ដដែល Liverpool ឈ្នះ៣ទល់០នៅក្នុងទឹកដីរបស់ខ្លួន។ ក្រុមទាំង២នឹងត្រូវជួបគ្នាវេលាម៉ោង២រំលងអធ្រាត្រឈានចូលថ្ងៃទី២៨ ខែមេសានេះម៉ោងនៅកម្ពុជា ខណៈដែលការប្រកួតជើងទី២នឹងធ្វើឡើងនៅថ្ងៃទី៤ ខែឧសភាខាងមុខ ៕
ដោយ៖ ភារៈ(រូបភាព ៖ soccerway.com)
