សារព័ត៌មាន នគរវត្ត តែងតែនាំមុខគេជានិច្ច
ខេត្តតាកែវ និងខេត្តប៉ៃលិន៖ មន្រ្តីជំនាញ ក.ប.ប. សាខាខេត្តតាកែវ និងខេត្តប៉ៃលិន នាថ្ងៃទី២៣ ខែឧសភា ឆ្នាំ២០២២ បានបន្តស្វែករកភាពមិនអនុលោមលើទំនិញគ្រប់ប្រភេទ និងសារធាតុគីមីហាមឃាត់ដែលប៉ះពាល់សុខភាពអ្នកបរិភោគតាមរយៈការចុះត្រួតពិនិត្យនៅលើទីផ្សារ ម៉ាត និងទីតាំងផលិតម្ហូបអាហារជាដើម។ នេះបេីយោងតាមប្រភពព័ត៍មានពីអគ្គនាយកដ្ឋាន ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ។
ប្រភពដដែលបន្តថា គោលបំណងគឺដើម្បីការពារសុខុមាលភាពអ្នកប្រើប្រាស់ និងប្រជាពលរដ្ឋទូទៅ ចៀសវាងការទិញទំនិញដែលមិនមានអនុលោមភាពយកទៅប្រើប្រាស់ ក៏ដូចជាបរិភោគផងដែរ។
យោងតាមលទ្ធ មន្រ្តីជំនាញបានរកឃើញ និងដកហូតបានទំនិញមិនមានអនុលោមភាពចំនួន ២០.៧០គីឡូក្រាម និងពិន័យអន្តរការណ៍ទៅតាមនីតិវិធី។
ជាមួយគ្នានោះ នៅថ្ងៃដដែល មន្រ្តីជំនាញ ក.ប.ប. ខេត្តកំពង់ឆ្នាំង ខេត្តពោធិ៍សាត់ ខេត្តព្រះសីហនុ ខេត្តកណ្ដាល និងខេត្តកំពង់ស្ពឺ ចាត់វិធានការទៅតាមនីតិវិធីច្បាប់ ចំពោះដេប៉ូប្រេងឥន្ធនៈចំនួន ៥ទីតាំង ក្នុងចំណោម ២៥ស្ថានីយ និងដេប៉ូដែលបានត្រួតពិនិត្យ និងព្រមទទួលពិន័យអន្តរការណ៍ផងដែរ។ ក្នុងការទប់ស្កាត់អំពើមិនសុចរិត និងការពារសិទ្ធិរបស់អ្នកប្រើប្រាស់ក្នុងវិស័យធុរកិច្ចប្រេងឥន្ធនៈ ដើម្បីស្វែករកភាពមិនអនុលោមណាមួយ ចៀសវាងការកេងប្រវ័ញ្ចណាមួយពីអតិថិជនដែលជាអ្នកប្រើប្រាស់៕
ដោយ៖សហការី
