សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ យោងតាមរបាយការណ៍ពីនាយកដ្ឋាននគរបាលចរាចរណ៍ និងសណ្តាប់ធ្នាប់សាធារណៈ ស្តីពីការរឹតបន្ដឹងច្បាប់ស្ដីពីចរាចរណ៍ផ្លូវគោក បានឱ្យដឹងថា កម្លាំងនគរបាលទូទាំងប្រទេស បានធ្វេីការត្រួតពិនិត្យ និងផាកពិន័យយានយន្តសរុបចំនួន ២៣១គ្រឿង នៅថ្ងៃទី១៣ ខែមិថុនា ឆ្នាំ២០២២នេះ ក្នុងនោះមានម៉ូតូ ២១៣គ្រឿង និងរថយន្ត ១៨គ្រឿង។
របាយការណ៍ដដែល បន្តថា គិតថ្ងៃទី១៣ ខែមិថុនា ក្នុងឆ្នាំ២០២២នេះ នគរបាលចរាចរណ៍ទូទាំងប្រទេស បានត្រួតពិនិត្យ និងផាកពិន័យយានយន្តសរុបចំនួន ៨២,៧៥១គ្រឿង ក្នុងនោះមានម៉ូតូ ៦៤,៧៧៧គ្រឿង និងរថយន្តគ្រប់ប្រភេទ ១៧,៩៧៤គ្រឿងដោយអនុវត្តតាមអនុក្រឹត្យលេខ៣៩។
បទល្មើសដែលត្រូវបានកត់សម្គាល់សម្រាប់ម៉ូតូរួមមាន៖ មួក ល្មើសសញ្ញា អត់ស្លាកលេខ និងទូរស័ព្ទដៃ។ ដោយឡែករថយន្តល្បឿន ខ្សែក្រវ៉ាត់ ទូរស័ព្ទដៃ ឆៀក និងល្មើសសញ្ញាជាដើម។
ជាមួយគ្នានេះ របាយការណ៍ពីនាយកដ្ឋាននគរបាលចរាចរណ៍បានឱ្យដឹងដែរថា៖ សម្រាប់ថ្ងៃទី១៣ ខែមិថុនា ឆ្នាំ២០២២នេះ គ្រោះថ្នាក់ចរាចរណ៍នៅទូទាំងប្រទេសកម្ពុជាក៏បានកើតឡើងចំនួន ០៩លើក ក្នុងនោះស្លាប់ចំនួន ០៦នាក់ របួស ០៦នាក់ (របួសធ្ងន់ ០៦នាក់)។ រយៈពេល១៦៤ថ្ងៃនេះ មានករណីគ្រោះថ្នាក់ចរាចរណ៍ចំនួន ១,៤៨១លើក បណ្ដាលឱ្យមនុស្សស្លាប់ ៨៥៩នាក់ របួស ២,០៥៣នាក់ (របួសធ្ងន់ ១,៣១២នាក់)៕
ដោយ៖អារុណរះ(រូបថត៖ ឯកសារ)
