សារព័ត៌មាន នគរវត្ត តែងតែនាំមុខគេជានិច្ច
Cristiano Ronaldo នឹងត្រូវជួបអ្នកចាត់ការទូទៅរបស់ក្លិប Manchester United លោក Erik ten Hag ដើម្បីពិភាក្សាអំពីអនាគតរបស់គាត់នៅក្លិប។ ខ្សែប្រយុទ្ធសញ្ជាតិព័រទុយហ្គាល់វ័យ៣៧ឆ្នាំរូបនេះចង់ឱ្យក្លិបអនុញ្ញាតឱ្យគាត់ចាកចេញនៅរដូវក្តៅនេះ ហើយគាត់បានខកខានដំណើរប្រកួតមុនរដូវកាលរបស់ Manchester United ទៅប្រទេសថៃ និងអូស្ត្រាលី ដោយសារតែហេតុផលផ្ទាល់ខ្លួន។ គាត់មិនទាន់បានហ្វឹកហាត់ជាមួយក្រុមនៅឡើយទេ ប៉ុន្តែឥឡូវនេះបានហោះត្រឡប់ទៅ Manchester វិញ។
លោក Ten Hag ធ្លាប់បាននិយាយថា Ronaldo “មិនមែនសម្រាប់លក់” និង “នៅក្នុងផែនការរបស់យើង”។ Ronaldo បានត្រឡប់មក Manchester United កាលពីរដូវកាលមុនបន្ទាប់ពីលេងឱ្យ Real Madrid និង Juventus។
លោក Ten Hag បានអះអាងថា គាត់បាននិយាយជាមួយ Ronaldo មុនពេលដំណើរប្រកួតទេសចរណ៍ដោយពន្យល់ថា “ខ្ញុំមានការពិភាក្សាដ៏ល្អមួយ។ នោះគឺរវាង Cristiano និងខ្ញុំ។ អ្វីដែលខ្ញុំអាចបញ្ជាក់បានគឺពួកយើងពិតជាមានការសន្ទនាដ៏ល្អជាមួយគ្នា”។
ការអវត្តមានរបស់ Ronaldo ពីដំណើរប្រកួតទេសចរណ៍នេះបានជំរុញឱ្យមានការរំពឹងទុកអំពីអនាគតរបស់គាត់ បន្ទាប់ពីគាត់ក៏បានខកខានការវិលត្រឡប់របស់ក្លិបទៅហ្វឹកហាត់មុនរដូវកាលនៅ Carrington។ ជំនួសមកវិញគាត់បានហ្វឹកហាត់នៅទីស្នាក់ការកណ្តាលរបស់ក្រុមជម្រើសជាតិព័រទុយហ្គាល់។ Ronaldo គឺជាអ្នកស៊ុតបញ្ចូលទីច្រើនជាងគេរបស់ Manchester United កាលពីរដូវកាលមុន ហើយជាកីឡាករទី៣នៅ Premier League ប៉ុន្តែយុទ្ធនាការទាំងមូលរបស់ក្លិបត្រូវបានគេមើលឃើញថា ជាការខកចិត្តដ៏ធំមួយ ។
ក្លិប Manchester United បានបញ្ចប់ក្នុងចំណាត់ថ្នាក់លេខ៦ក្នុងក្របខ័ណ្ឌ Premier League ដូច្នេះហើយបានខកខានក្នុងវគ្គជម្រុះ Champions League មានន័យថា Ronaldo ដែលនៅសល់កុងត្រាមួយឆ្នាំទៀតជាមួយ Manchester United បូកនឹងឆ្នាំជម្រើស នឹងត្រូវប្រឈមមុខនឹងការលេងនៅ Europa League ជាលើកដំបូង។
វាមិនមែនជាអ្វីដែលគាត់កំពុងមើលដោយរីករាយនោះទេ ហើយម្ចាស់ពានរង្វាន់ Ballon d’Or ៥សម័យរូបនេះមានអារម្មណ៍ថា អាចមានជម្រើសដ៏គួរឱ្យទាក់ទាញបន្ថែមទៀតសម្រាប់គាត់នៅដំណាក់កាលនេះក្នុងអាជីពរបស់គាត់។
ក្លិប Chelsea បានបញ្ចប់ការចាប់អារម្មណ៍លើកីឡាកររូបនេះកាលពីដើមខែនេះ ខណៈដែលរូបគេក៏មានទំនាក់ទំនងជាមួយ Bayern Munich និង Atletico Madrid ផងដែរ ខណៈដែលក្លិប Manchester United មិនចាត់ទុក Ronaldo ជាកីឡាករដែលត្រូវលក់នោះទេ។
Manchester United នឹងប្រកួតជាមួយក្រុម Atletico Madrid ក្នុងប្រទេសន័រវេសនៅថ្ងៃសៅរ៍ មុនពេលការប្រកួតមុនបើករដូវកាលចុងក្រោយរបស់ពួកគេនៅ Old Trafford ទល់នឹងក្រុម Rayo Vallecano នៅថ្ងៃអាទិត្យ។ ការប្រកួតដំបូងនៃរដូវកាលថ្មីរបស់ក្រុម Man Utd គឺត្រូវប៉ះក្រុម Brighton នៅថ្ងៃអាទិត្យទី៧ ខែសីហា ៕
ដោយ៖ ភារៈ(រូបភាព ៖ BBC Sport)
