សារព័ត៌មាន នគរវត្ត តែងតែនាំមុខគេជានិច្ច
ខេត្តស្វាយរៀង៖ មានករណីគ្រោះថ្នាក់ចរាចរណ៍ដ៏គួរឱ្យរន្ធត់មួយដោយសារតែរថយន្តហាយឡេនឌ័រមួយគ្រឿងព្រោះតែអ្នកបើកបរបើកបោះពួយលឿនពេកបានក្រឡាប់ធ្លាក់ចូលប្រឡាយទឹក បង្កការភ្ញាក់ផ្អើលដល់អ្នកភូមិនាំគ្នាមកចោមរោមមើលនិងជួយសង្គ្រោះយកមនុស្សចេញពីក្នុងរថយន្តដឹកយកទៅព្យាបាលនៅមន្ទីរពេទ្យ។
ហេតុការណ៍នេះបានកើតឡើងកាលពីវេលាម៉ោង២រសៀលថ្ងៃទី០៧ ខែសីហា ឆ្នាំ២០២២ នៅចំណុចលើផ្លូវក្រាលកៅស៊ូកំពុងសាងសង់ ស្ថិតក្នុងភូមិថ្មី ឃុំស្វាយចេក ស្រុករំដួល។
យោងតាមសមត្ថកិច្ចនគរបាលស្រុកបានឱ្យដឹងថា បុរសរងគ្រោះមានឈ្មោះ ស៊ិន ប៊ុនធឿន អាយុ៣០ឆ្នាំ រស់នៅភូមិសាលារៀន ឃុំបាសាក់ ស្រុកស្វាយជ្រំ ខេត្តស្វាយរៀង បើករថយន្តម៉ាកHighlander ពណ៌ទឹកប្រាក់ ពាក់ស្លាកលេខភ្នំពេញ២AW-៨៤០៣ បានរងការខូចខាតទាំងស្រុង។
តាមសាក្សីបានឱ្យដឹងថា មុនពេលកើតហេតុមានបុរសម្នាក់បានបើករថយន្តមួយគ្រឿងម៉ាកHighlander ពណ៌ទឹកប្រាក់ ពាក់ស្លាកលេខ ភ្នំពេញ ២AW-៨៤០៣ធ្វើដំណើរនៅលើផ្លូវក្រាលកៅស៊ូកំពុងសាងសង់ ហើយបានប្រើប្រាស់ល្បឿនលឿនធ្វេសប្រហែស ខ្វះការប្រុងប្រយ័ត្នធ្វើឱ្យរេចង្កូតក្រឡាប់ចូលទឹកប្រឡាយបង្កការភ្ញាក់ផ្អើលដល់អ្នកភូមិនាំគ្នាមកចោមរោមមើលនិងជួយសង្គ្រោះយកមនុស្សចេញពីក្នុងរថយន្តដឹកទៅកាន់មន្ទីរពេទ្យដើម្បីព្យាបាលផងដែរ៕
ដោយ ៖ យឹម សុថាន
