សារព័ត៌មាន នគរវត្ត តែងតែនាំមុខគេជានិច្ច
កីឡាករ Daniil Medvedev បានឈ្នះជើងឯក ATP ជាលើកដំបូងរបស់គាត់ក្នុងឆ្នាំ២០២២នេះជាមួយនឹងជ័យជម្នះលើកីឡាករលេខ១របស់អង់គ្លេស Cameron Norrie ក្នុងពានរង្វាន់ Los Cabos Open ក្នុងប្រទេសម៉ិកស៊ិកកាលពីរាត្រីថ្ងៃអាទិត្យ ទី៧ សីហា។ Medvedev មិនអាចលេងនោះទេក្នុងកម្មវិធី Wimbledon ដោយសារការហាមប្រាមកីឡាកររុស្ស៊ីនៅអង់គ្លេស។
កីឡាករវាយតឺន្នីសសញ្ជាតិរុស្សី Daniil Medvedev បានយកឈ្នះកីឡាករការពារតំណែងជើងឯកក្នុងលទ្ធផល ៧-៥ ៦-០ សម្រាប់ពានរង្វាន់ដំបូងរបស់គាត់ចាប់តាំងពីព្រឹត្តិការណ៍ US Open កាលពីឆ្នាំមុន។ ចាប់តាំងពីពេលនោះមក កីឡាករវ័យ២៦ឆ្នាំរូបនេះបានចាញ់ក្នុងការប្រកួតវគ្គផ្តាច់ព្រ័ត្រចំនួន៥ប៉ុន្តែមិនបានរបូតមួយសិតក្នុងសប្តាហ៍នេះនោះទេ។
កីឡាករ Daniil Medvedev បាននិយាយថា “រាល់ការប្រកួតគឺល្អណាស់ ប៉ុន្តែវគ្គផ្តាច់ព្រ័ត្រតែងតែពិសេស។ នៅក្នុងវគ្គផ្តាច់ព្រ័ត្រ អ្នកលេងជាកីឡាករល្អបំផុតប្រចាំសប្តាហ៍នេះ ដូច្នេះវាតែងតែជាការប្រកួតកម្រិតខ្ពស់ ហើយខ្ញុំពិតជាសប្បាយចិត្តដែលខ្ញុំបានគ្រប់គ្រងកម្រិតល្អខ្លះក្នុងការប្រកួតដ៏សំខាន់បែបនេះ”។
ចំណែកកីឡាករអង់គ្លេស Cameron Norrie បាននិយាយថា “ខ្ញុំបានតស៊ូតាមដែលខ្ញុំអាចធ្វើបាន ប៉ុន្តែ Daniil គឺល្អពេក”។
ការប្រកួតបន្ទាប់សម្រាប់ Medvedev គឺនឹងប្រកួតកំដៅសាច់ដុំត្រៀមកម្មវិធីប្រកួត US Open ដែលចាប់ផ្តើមនៅថ្ងៃទី២៦ ខែសីហាខាងមុខ នៅទីក្រុងញូវយ៉ក និងការប្រកួតការការពារជើងឯក Canadian Open របស់គាត់មុនពេល Cincinnati Masters ។
ទន្ទឹមនឹងនេះដែរ កីឡាករ Nick Kyrgios ដែលជាកីឡាករឡើងដល់ផ្តាច់ព្រ័ត្រកម្មវិធី Wimbledon នឹងត្រូវជួបជាមួយកីឡាករលំដាប់លេខ៩៦ពិភពលោក Yoshihito Nishioka របស់ប្រទេសជប៉ុនក្នុងវគ្គផ្តាច់ព្រ័ត្រនៃព្រឹត្តិការណ៍ Citi Open ក្នុងទីក្រុង Washington DC ។
កីឡាករអូស្ត្រាលី Nick Kyrgios ដែលបានឈ្នះជើងឯក ATP ចំនួន៦ចុងក្រោយរបស់គាត់នៅក្នុងព្រឹត្តិការណ៍នេះក្នុងឆ្នាំ២០១៩ បានយកឈ្នះកីឡាករស៊ុយអែត Mikael Ymer ក្នុងលទ្ធផល 7-6 (7-4) 6-3 ។ចំណែក Nishioka បានបន្តសប្តាហ៍ដ៏ល្អរបស់គាត់ ដែលរួមបញ្ចូលទាំងការឈ្នះលើកីឡាករ Dan Evans របស់ចក្រភពអង់គ្លេសក្នុងវគ្គ៨ក្រុមចុងក្រោយ និងបានយកឈ្នះលើកីឡាករកំពូលរុស្ស៊ី Andrey Rublev ។
នៅក្នុងព្រឹត្តិការណ៍នារី កីឡាការិនីវ័យ៣៧ឆ្នាំ Kaia Kanepi មកពីប្រទេសអ៊ីស្តូនីនឹងប្រជែងជើងឯក WTA លើកដំបូងរបស់នាងក្នុងរយៈពេល៩ឆ្នាំនៅពេលដែលនាងប្រឈមមុខនឹងកីឡាកររុស្ស៊ី Liudmila Samsonova។ Kanepi ដែលជាកីឡាការិនីលំដាប់លេខ៣៧ពិភពលោកបានយកឈ្នះលើកីឡាការិនី Daria Saville របស់អូស្ត្រាលីក្នុងលទ្ធផល 6-3 6-1 ខណៈដែល Samsonova បានយកឈ្នះលើកីឡាការិនី Wang Xiyu របស់ចិនក្នុងលទ្ធផល 6-1 6-1 ៕
ដោយ៖ ភារៈ(រូបភាព ៖ BBC Sport)
