សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ជនសង្ស័យ២នាក់ជាមុខសញ្ញាកាច់កម៉ូតូយ៉ាងសកម្មបានដកកាំភ្លើងខ្លីបាញ់សំដៅទៅលើកម្លាំងកងរាជអាវុធហត្ថចំនួន២គ្រាប់ តែសំណាងល្អបាញ់មិនត្រូវ រួចបានរត់ចោលមូ៉តូមួយគ្រឿងនៅនឹងកន្លែងកើតហេតុ។ហេតុការណ៍នេះបង្កឱ្យមានការភ្ញាក់ផ្អើលឡើងកាលពីម៉ោង១០និង២០នាទីយប់ថ្ងៃទី១៦ ខែសីហា ឆ្នាំ២០២២ ស្ថិតនៅតាមបណ្តោយផ្លូវបេតុង ខាងក្រោយផ្សារមីតថោន ក្នុងសង្កាត់អូរបែកក្អម ខណ្ឌសែនសុខ រាជធានីភ្នំពេញ។
ប្រភពព័ត៌មានពីកម្លាំងកងរាជអាវុធហត្ថខណ្ឌសែនសុខបានឱ្យដឹងថា នៅវេលាម៉ោង៨យប់ថ្ងៃទី១៦ ខែសីហា ឆ្នាំ២០២២ កម្លាំងកងរាជអាវុធហត្ថបានចុះល្បាតតាមគោលដៅផ្សេងៗដូចសព្វមួយដង ហើយពេលល្បាតមកដល់ត្រង់ចំណុចការាសសាំងតូតាល់ផ្លូវសហព័ន្ធរុស្ស៊ី ទល់មុខផ្សារអែតវ៉ូតស្រាប់តែប្រទះឃើញជនសង្ស័យមានគ្នា២នាក់ជិះម៉ូតូម៉ាកហុងដាឃ្លីក ពណ៌សមួយគ្រឿងពាក់ស្លាកលេខ ភ្នំពេញ1JA-8054 កំពុងតែធ្វើសកម្មភាពចូលទៅកាច់កម៉ូតូម៉ាកហុងដាម៉ាកហុងដាឃ្លីក ពណ៌សមួយគ្រឿងមិនចាំស្លាកលេខនៅចំណុចផ្លូវសហព័ន្ធរុស្ស៊ី ក្នុងការាសសាំងតូតាល់។ ខណៈកំពុងធ្វើសកម្មភាពនោះជនសង្ស័យទាំង២នាក់ បានឃើញកម្លាំងកងរាជអាវុធហត្ថ ក៏ជិះម៉ូតូរត់គេចខ្លួន ហើយភ្លាមៗនោះដែរកម្លាំងកងរាជអាវុធហត្ថខណ្ឌសែនសុខ ក៏បានចូលទៅក្នុងការាសសាំងតូតាល់ ឆែកមើលកាមេរ៉ាសុវត្ថិភាពដើម្បីកំណត់មុខសញ្ញា។ នៅក្នុងកាមេរ៉ាសុវត្ថិភាពនោះឃើញមានជនសង្ស័យ២នាក់បានចូលមកកាច់សោ.កយកម៉ូតូម៉ាកហុងដា ADV មិនចាំស្លាកលេខបានសម្រេចមួយគ្រឿងបាត់ទៅហើយ បន្ទាប់មកទើបជនសង្ស័យទាំង២នាក់នោះត្រឡប់មកម្តងទៀត រៀបនឹងកាច់កយកម៉ូតូម៉ាកClickមួយគ្រឿងទៀត តែមិនបានសម្រេចត្រូវកម្លាំងកងរាជអាវុធហត្ថឃើញទាន់ ទើបជនសង្ស័យបាននាំគ្នាជិះម៉ូតូរត់គេចខ្លួនបាត់ស្រមោលទៅ។
ប្រភពបានបន្តឲ្យដឹងទៀតថា បន្ទាប់ពីឆែកកាមេរ៉ាសុវត្ថិភាពរួច កម្លាំងអាវុធហត្ថក៏បានតាមរកជនសង្ស័យទាំង២នាក់នោះ ស្រាប់តែមកប្រទះឃើញកំពុងតែអង្គុយផឹកស៊ីនៅចំណុចខាងក្រោយផ្សារមីតថោន ភ្លាមៗនោះដែរជនសង្ស័យទាំង២នាក់នោះបានដឹងខ្លួនមុនក៏រត់ចេញពីកន្លែងផឹកសុីឡើងជិះម៉ូតូរួចដកកាំភ្លើងខ្លីបាញ់សំដៅទៅលើកម្លាំងកងរាជអាវុធហត្ថចំនួន២គ្រាប់ តែមិនត្រូវ រួចបម្រុងនឹងឡើងម៉ូតូជិះរត់គេចខ្លួន តែត្រូវខាងអាវុធហត្ថបាញ់សំដៅជនសង្ស័យទាំង២នាក់នោះវិញជាច្រើនគ្រាប់ បណ្តាលឱ្យជនសង្ស័យភ័យរត់គេចខ្លួនចោលម៉ូតូបាត់ស្រមោលទៅ ហើយសំណាងល្អដែរដែលមិនមានគ្រោះថ្នាក់ដល់អ្នកជិតខាង រួមទាំងកម្លាំងកងរាជអាវុធហត្ថផងដែរ។
បន្ទាប់ពីកើតហេតុ ខាងកម្លាំងកងរាជអាវុធហត្ថ បានសហការគ្នាជាមួយសមត្ថកិច្ចខណ្ឌសែនសុខចុះពិនិត្យទីតាំងកើតហេតុ រួចឃាត់មនុស្សជាច្រើននាក់ សាកសួរបន្ត។ ក្រោយមកទើបឱ្យត្រឡប់ទៅផ្ទះវិញ និងយកម៉ូតូជនសង្ស័យម៉ាកហុងដាclickមួយគ្រឿងទៅរក្សាទុកនៅអធិការដ្ឋាននគរបាលខណ្ឌសែនសុខ ចំណែកឯជនសង្ស័យនិងបក្ខពួក សមត្ថកិច្ចកំពុងតាមស្រាវជ្រាវបន្តដើម្បីចាប់ខ្លួនយកមកចាត់ការតាមនីតិវិធី៕
ដោយ៖ ជ្រោយពេជ្រ
