សារព័ត៌មាន នគរវត្ត តែងតែនាំមុខគេជានិច្ច
ខេត្តកំពង់ចាម ៖ អាជ្ញាធរបានហាមឃាត់រថយន្តធុនធំឆ្លងកាត់ត្រង់ចំណុចភូមិព្រែកកុយ ស្រុកកងមាស ខេត្តកំពង់ចាម ខណៈដែលមានការបាក់ច្រាំងនៅតែបន្ត ហើយអាចបង្កហានិភ័យបើសិនមានរថយន្តធុនធំបើកឆ្លងកាត់។
សូមបញ្ជាក់ថា ៖ នៅព្រឹកថ្ងៃទី១៤ ខែកញ្ញា ឆ្នាំ២០២២ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានដឹកនាំមន្ត្រីជំនាញ រួមទាំងអាជ្ញាធរស្រុកកងមាសចុះពិនិត្យមើលស្ថានភាពបាក់ស្រុតច្រាំងព្រែកកុយដោយផ្ទាល់ ដែលហេតុការណ៍បាក់ស្រុតច្រាំងព្រែកកុយនេះបានកើតឡើងកាលពីថ្ងៃទី១២ ខែកញ្ញា ឆ្នាំ២០២២មកម្ល៉េះ ប៉ុន្តែស្ថានភាពបាក់ស្រុតនៅតែបន្តកើត។
ហេតុការណ៍នេះបានរងផលប៉ះពាល់ផ្លូវ មិនអាចឱ្យរថយន្តធុនធំៗបើកឆ្លងកាត់បាន ដោយមានប្រវែងបណ្តោយចំនួន២០ម៉ែត្រ និងទទឹង០៤ម៉ែត្រ នៅត្រង់ចំណុចហួសគល់ស្ពានព្រែកបារ៉ាយ នៅភូមិព្រែកកុយ ឃុំព្រែកកុយ ដែលធ្វើឱ្យប៉ះពាល់ដល់គម្រោងផ្លូវ World Bank ចាប់ពីចំណុចគល់ស្ពានអន្លង់គគីរ ឃុំព្រែកកុយ ទៅឃុំសូគង ប្រវែង២៧,៦០០ម៉ែត្រ។
ជាមួយគ្នានេះ លោក អ៊ុន ចាន់ដា បានឱ្យកងកម្លាំងប៉ុស្តិ៍ រួមជាមួយអាជ្ញាធរមូលដ្ឋានយកចិត្តទុកដាក់ការពារ និងបញ្ចៀសចរាចរណ៍រថយន្តធុនធំៗកុំឱ្យបើកបរឆ្លងកាត់តំបន់នេះ ហើយរិះរកវិធីសាស្ត្រដោះស្រាយភ្លាមៗប្រសិនបើច្រាំងព្រែកនេះបន្តស្រុតទៀត។
លោកអភិបាល នៃគណៈអភិបាលខេត្ត និងអាជ្ញាធរស្រុកបានណែនាំឱ្យបងប្អូនប្រជាពលរដ្ឋមានការប្រុងប្រយ័ត្នខ្លាចកើតមាននូវឧប្បត្តិហេតុផ្សេងៗ ប្រសិនបើទឹកទន្លេហក់ឡើង ឬបង្កឱ្យបាក់ច្រាំងបន្តទៀត ៕
ដោយ ៖ សហការី
