សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ គិតចាប់តាំងពីឆ្នាំ២០០២ ដល់ឆ្នាំ២០២២នេះ កិច្ចសហការរុករកអដ្ឋិធាតុកងទ័ពប្រជាជនវៀតណាម នៅក្នុងប្រទេសកម្ពុជា បានរកឃើញអដ្ឋិធាតុសរុប ២៣.០៧៤ធាតុ ដែលអដ្ឋិធាតុទាំងនោះ ត្រូវបានរកឃើញដោយ ៦យោធភូមិភាគ។ នេះបេីយោងតាមការបញ្ជាក់ពីលោកនាយឧត្តមសេនីយ៍ ឈុំ សុជាតិ រដ្ឋលេខាធិការ និងជាអ្នកនាំពាក្យក្រសួងការពារជាតិ ថ្លែងឱ្យដឹងនៅថ្ងៃចន្ទទី០៣ ខែតុលា ឆ្នាំ២០២២។
លោកអ្នកនាំពាក្យ បានគូសបញ្ជាក់យ៉ាងដូច្នេះថា៖ យោធភូមិភាគទាំង៦នោះ រួមមាន៖ យោធភូមិភាគពិសេស រកឃើញ ២០០៧ធាតុ យោធភូមិភាគទី១ រកឃើញ២២៤១ធាតុ យោធភូមិភាគទី២ រកឃើញ ៨១៥៣ធាតុ យោធភូមិទី៣ រកឃើញ ៤១៧១ធាតុ យោធភូមិភាគទី៤ រកឃើញ២៧៩៤ធាតុ យោធភូមិភាគទី៥ រកឃើញ៣៧០៨ធាតុ។
លោកនាយឧត្តមសេនីយ៍ ឈុំ សុជាតិ បានគូសបញ្ជាក់បន្ថែមថា បន្ទាប់ពីបានរកឃើញ រហូតដល់ពេលនេះ អដ្ឋិធាតុកងទ័ពប្រជាជនវៀតណាម ជាបន្តបន្ទាប់ត្រូវបានភាគីកម្ពុជា ប្រគល់ជូនភាគីវៀតណាមផងដែរ។
សូមជម្រាបថា កាលពីថ្ងៃទី២៨ ខែសីហា ឆ្នាំ២០០០ រាជរដ្ឋាភិបាលកម្ពុជា និងរដ្ឋាភិបាលវៀតណាម បានចុះហត្ថលេខាលើកិច្ចព្រមព្រៀងមួយ ស្តីពីការរុករកការប្រមូលផ្តុំ និងការធ្វើមាតុភូមិនិវត្តន៍អដ្ឋិធាតុរបស់កងទ័ពស្ម័គ្រចិត្តវៀតណាមដែលពលី ក្នុងសម័យសង្រ្គាមនៅប្រទេសកម្ពុជា៕ ដោយ៖សហការី
រូបភាព៖ឯកសារ ការដង្ហែអដិ្ឋធាតុ នៃយុទ្ធជនពលីវៀតណាមចំនួន១៨ ពីខេត្តព្រះវិហារ ឆ្ពោះទៅកាន់ស្រុក ដឹកកឺ ខេត្តយ៉ាឡាយ នៃសាធារណរដ្ឋសង្គមនិយមវៀតណាម កន្លងទៅ
