សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ បុរសម្នាក់ផ្សាររថយន្តមិនប្រុងប្រយ័ត្នធ្វើឱ្យប៉ះចំខ្សែភ្លេីងរហែកសម្បកបណ្តាលឱ្យឆក់ស្លាប់ភ្លាមៗ នៅក្នុងយានដ្ឋានជួសជុលរថយន្តមួយកន្លែងស្ថិតនៅតាមបណ្តោយផ្លូវក្រវាត់ក្រុងភ្នំពេញ(ផ្លូវ៥០ម៉ែត្រ) ក្នុងភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ កាលពីវេលាម៉ោង១០និង៣០នាទីព្រឹកថ្ងៃទី៦ ខែតុលា ឆ្នាំ២០២២ ។
ជនរងគ្រោះមានឈ្មោះ ថូ ផាត់យុត ភេទប្រុស អាយុ២៨ឆ្នាំ ជាជាងផ្សារ ស្នាក់នៅកន្លែងកើតហេតុ មានស្រុកកំណើតនៅភូមិក្អមសំណក្រោម ឃុំក្អមសំណ ស្រុកលើកដែក ខេត្តកណ្តាល។
តាមប្រភពព័ត៌មានបានឱ្យដឹងថា មុនពេលកេីតហេតុជនរងគ្រោះបានផ្សារតោនរថយន្តមួយគ្រឿង ហើយខណៈកំពុងផ្សារក៏បានប៉ះខ្សែភ្លេីងដែលរបកសំបកបណ្តាលឱ្យឆក់។ ភ្លាមៗនោះអ្នកធ្វើការឃេីញដូចនេះក៏ជួយសង្គ្រោះនាំគ្នាយកទៅកប់ដីខ្សាច់ តែជាអកុសលជនរងគ្រោះបានស្លាប់បាត់ទៅហេីយ។
ក្រោយពីសមត្ថកិច្ចជំនាញបានពិនិត្យធ្វើកោសល្យវិច័យរួចក៏បានបញ្ជាក់ថាបុរសដែលបាត់បង់ជីវិតខាងលើពិតជាស្លាប់ដោយសារត្រូវខ្សែភ្លើងឆក់ប្រាកដមែន ដូច្នេះសមត្ថកិច្ចបានប្រគល់សពជូនក្រុមគ្រួសារធ្វើបុណ្យតាមប្រពៃណី៕
ដោយ៖សុខាសែនជ័យ
