ឆេះ រោងចក្រផលិតទោចក្រយានយន្តក្នុងតំបន់សេដ្ឋកិច្ចពិសេសឈីលូ សង្ស័យឆ្លងចរន្តអគ្គិសនីផ្អើលទាំងព្រឹក

ខេត្តស្វាយរៀង៖ មានការភ្ញាក់ផ្អើលដល់កម្មករកម្មការិនីរោងចក្រឆោឡោនិងរាយការណ៍មកសមត្ថកិច្ចមូលដ្ឋានមក អន្តរាគមន៍ យករថយន្តជួយបាញ់ពន្លត់បន្ទាប់ពីមានអគ្គិភ័យឆេះក្នុងរោងចក្រក្នុងតំបន់សេដ្ឋកិច្ចពិសេសឈីលូ សង្ស័យឆ្លងចរន្តអគ្គិសនី។

ហេតុការណ៍នេះបានកើតឡើងកាលពីវេលាម៉ោង១០និង១០នាទីព្រឹកថ្ងៃទី ២៦ ខែ តុលា ឆ្នាំ២០២២ស្ថិតក្នុងតំបន់សេដ្ឋកិច្ចពិសេសឈីលូ ស្ថិតក្នុងភូមិស្វាយតឿ សង្កាត់ស្វាយតឿ ក្រុងស្វាយរៀង។

យោងតាមសមត្ថកិច្ចនគរបាលក្រុងស្វាយរៀងបានឲ្យដឹងថារោងចក្រដែលត្រូវអគ្គិភ័យឆាបឆេះគឺនៅរោងចក្រ XDS (រោងចក្រផលិតទោចក្រយានយន្ត) ចំពោះសម្ភារៈដែលខូចខាតរួមមានឧបករណ៍ប្រើប្រាស់មួយចំនួនផងដែរ។

ប្រភពបន្តថា ក្រោយពីទទួលបានព័ត៌មានថាមានករណីឆេះរោងចក្រភ្លាម កម្លាំងអធិការដ្ឋាននគរបាលក្រុងស្វាយរៀង សហការជាមួយកម្លាំងការិយាល័យជំនាញ កម្លាំងកងរាជអាវុធហត្ថ ប៉ុស្តិ៍នគរបាលរដ្ឋបាល និងបងប្អូនកម្មកររោងចក្រ ធ្វើការអន្តរាគមន៍ជួយបាញ់ដោយបំពង់ពន្លត់អគ្គីភ័យ និងប្រព័ន្ធ ទុយោទឹកក្នុងរោងចក្រ ។

ប្រភពបន្តថាក្រោយពីអន្តរាគមន៏ជួយបាញ់ពន្លត់រហូតដល់រលត់ទាំងស្រុងនៅវេលាម៉ោង១០ និង៣៥នាទី ព្រឹកថ្ងៃដដែលខណៈមិនមានអ្នករងគ្រោះថ្នាក់នោះទេគ្រាន់តែខូចខាតសម្ភារនិងឧបករណ៍ប្រើប្រាស់មួយចំនួនតែប៉ុណ្ណោះ ដោយសារមូលហេតុឆ្លងចរន្តអគ្គិសនី។

សូមបញ្ជាក់ថាក្នុងហេតុការណ៍នោះក៏ឃើញមានវត្តមាន លោកសរ សុដានី អភិបាលរងក្រុងលោកស្នងការរងនគរបាលខេត្ត លោកមេបញ្ជាការងអាវុធហត្ថខេត្តកម្លាំងអធិការដ្ឋាននគរបាលក្រុងនិងសមត្ថកិច្ចដែលពាក់ព័ន្ធចុះមកអន្តរាគមន៍ភ្លាមៗផងដែរ៕

ដោយ៖ សុថាន