សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ រថយន្តម៉ាក Toyota Prius មួយគ្រឿង បានបេីកបុកជាមួយនឹងរថយន្តម៉ាក Toyota Scion xa មួយគ្រឿងទៀតនៅផ្លូវបំបែកជាបួន បណ្ដាលឱ្យខូចខាតទាំងសងខាង យ៉ាងដំណំ កាលពីវេលាម៉ោង១២និង១០នាទី យប់រំលងអធ្រាត្រឈានចូលថ្ងៃពុធ ទី៣០ ខែវិច្ឆិកា ឆ្នាំ២០២២ នៅត្រង់ចំណុចស្តុប២៤ម៉ោង តាមបណ្តោយផ្លូវសម្តេចជាសុីម កែងនិងផ្លូវភ្នំពេញហាណូយ ក្នុងសង្កាត់ភ្នំពេញថ្មី ខណ្ឌសែនសុខ រាជធានីភ្នំពេញ។
តាមប្រភពពីកន្លែងកើតហេតុបានឲ្យដឹងថា ដំបូងឡើយគេឃើញរថយន្តម៉ាក តូយូតាព្រូស ពណ៌ស ស៊េរីឆ្នាំ២០១០ពាក់ស្លាកលេខភ្នំពេញ 2AZ.6983បើកបរដោយបុរសម្នាក់តាមបណ្តោយផ្លូវសម្តេច ជា សុីម ទិសសដៅពីលិចទៅកើតយ៉ាងលឿន ខណៈមកដល់ចំណុចកើតហេតុខាងលើក៏ជ្រុលទៅបុកគ្នាជាមួយនិងរថយន្តម៉ាក Toyota Scion xa មួយគ្រឿងទៀត ពណ៌ស ស៊េរីឆ្នាំ២០០៦ ពាក់ស្លាកលេខភ្នំពេញ2BO.5672បើកបរដោយបុរស
ម្នាក់តាមបណ្តោយផ្លូវភ្នំពេញហាណូយ ទិសដៅពីត្បូងមកជើង ក្នុងល្បឿនលឿនដូចគ្នា បានបុកគ្នាពេញទំហឹងបណ្ដាលឱ្យរងការខូចខាតផ្នែកខាងមុខដូចគ្នាយ៉ាងដំណំ។ ដោយឡែករថយន្តScion បានរេចង្កូតទៅបុករបងផ្ទះប្រជាពលរដ្ឋកល់ជាប់ទៅមុខលែងរួច តែក្នុងហេតុការណ៍គ្រោះថ្នាក់ចរាចរណ៍នេះមិនបណ្ដាលឲ្យនរណាម្នាក់រងរបួសនោះទេ។
ក្រោយពីកើតហេតុ ភាគីទាំងសងខាង បានចេញពីកន្លែងកើតហេតុបាត់អស់បន្សល់ទុកតែរថយន្តទុកឲ្យសមត្ថកិច្ចជំនាញចរាចរណ៍ខណ្ឌធ្វេីការវាស់វែងស្ទូចយករថយន្តទៅរក្សាទុកនៅការិយាល័យចរាចរណ៍ផ្លូវគោក នៃស្នងការដ្ឋាននគរបាលរាធានីភ្នំពេញ រង់ចាំភាគីទាំងសងខាងចូលខ្លួនមកដោះស្រាយនៅពេលក្រោយ ៕
ដោយ ៖ ភារ៉ា ដង្កោ
