សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ ស្ត្រីម្នាក់ធ្វេីដំណេីរទៅប៉ុស្តិ៍នគរបាលទាំងព្រឹកសុំការអន្តរាគមន៍ក្រោយពីជនសង្ស័យបានលួចយកម៉ូតូទៅបាត់ខណៈទុកម៉ូតូនៅមុខផ្សារហេីយកំពុងទិញបន្លែកាលពីវេលាម៉ោង៦និង៣០នាទីព្រឹក ថ្ងៃទី០៨ ខែធ្នូ ឆ្នាំ២០២២ នៅតាមចិញ្ចើមផ្លូវជាតិលេខ៤ ភូមិជម្ពូវ័ន១ សង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ ។
ជនរងគ្រោះឈ្មោះ ឃុត សុភ័ក្រ ភេទស្រី អាយុ៣៨ឆ្នាំ មុខរបរ លក់បន្លែ មានទីលំនៅ ក្នុងភូមិត្រពាំងគល់ សង្កាត់កន្ទោក ខណ្ឌកំបូល រាជធានីភ្នំពេញ ។ ចំណែកម៉ូតូ ដែលជនសង្ស័យ ធ្វើសកម្មភាព លួចយកទៅបាត់នោះ ម៉ាកហុងដាឌ្រីម ស៊េរី២០២០ ពណ៌ខ្មៅ ពាក់ស្លាកលេខ 1IN-4137 មានចងថង់បន្លែ សាច់ ជាប់ជាមួយផង ។
បើតាមសម្តីស្ត្រីរងគ្រោះ បានប្រាប់ឲ្យដឹងថា មុនកើតហេតុ គាត់ជិះម៉ូតូមករកទិញបន្លែ សាច់ នៅផ្សារជម្ពូវ័ន ដើម្បីយកទៅលក់បន្តនៅខណ្ឌកំបូល ហើយទិញបានមួយចំនួនហើយ ចងដាក់លើម៉ូតូ ដែលចតទុក ចាក់សោត្រឹមត្រូវ ក្បែរកន្លែងទិញបន្លែ នៅសល់តែគ្រឿងទេស កំពុងតែរើសប្រមូលច្រកថង់ ស្រាប់តែឮសូរសំឡេងបញ្ឆេះម៉ូតូក្រោយខ្នង ក្រឡេកមើល ឃើញជនសង្ស័យកាច់សោ.ក ជិះចេញទៅហើយ រត់ដេញតាមចាប់ផង ស្រែកផង តែគ្មានអ្នកជួយ ជនសង្ស័យជិះគេចទៅបាត់ស្រមោល ។
ក្រោយកេីតហេតុជនរងគ្រោះបានត្រឹមទៅដាក់ពាក្យបណ្តឹងនៅប៉ុស្តិ៍នគរបាលដេីម្បីសុំការអន្តរាគមន៍។
ពលរដ្ឋបានលើកឡើងថា បទល្មើស លួច ឆក់ ក្នុងមូលដ្ឋានខណ្ឌពោធិ៍សែនជ័យ កើតមានរាល់ថ្ងៃ មិនស្វាង គ្មានទំនេរថ្ងៃណាមួយ សមត្ថកិច្ចចាប់មិនចេះអស់ ៕
ដោយ៖ សុខាសែនជ័យ
