🔴Update ៖ មានករណីផ្ទុះអាវុធជាច្រើនគ្រាប់ ក្នុងការចុះបង្ក្រាបគ្រឿងញៀន បណ្តាលឱ្យស្លាប់មន្ត្រីនគរបាលម្នាក់

ភ្នំពេញ ៖ លោកវរសេនីយ៍ទោ ជាង ហុកសែ អធិការរងនគរបាលខណ្ឌដង្កោ ទទួលផែនយុត្តិធម៌ បានប្រាប់សារព័ត៌មានថា, តាមប្រភពជំហានដំបូងឱ្យដឹងថា មានការចុះបង្ក្រាបគ្រឿងញៀន ពីសំណាក់សមត្ថកិច្ច នៃមន្ទីរប្រឆាំងគ្រឿងញៀន អគ្គស្នងការដ្ឋាននគរបាលជាតិ បើកការចុះបង្ក្រាបក្រុមជួញដូរគ្រឿងញៀនមួយក្រុមធំ រហូតមានការផ្ទុះអាវុធតបតគ្នា បណ្តាលឱ្យ មន្ត្រីនគរបាលម្នាក់បានស្លាប់ បង្កការភ្ញាក់ផ្អើល ជាខ្លាំង នាវេលាម៉ោង ១៩ និង៣០នាទីយប់ថ្ងៃទី២៨ ខែធ្នូ ឆ្នាំ២០២២នេះ ។

ពិតជាគួរឱ្យសោកស្តាយ និងរន្ធត់ចំពោះការពលី របស់សមត្ថកិច្ច ក្នុងការបង្រ្កាបបទល្មើស ជួបគ្រោះថ្នាក់បែបនេះ ។ 

លោកវរសេនីយ៍ទោ ជាង ហុកសែ អធិការរងនគរបាលខណ្ឌដង្កោ ទទួលផែនយុត្តិធម៌ បានប្រាប់សារព័ត៌មាន តាមទូរស័ព្ទ នាយប់ថ្ងៃខែ ដដែលឱ្យដឹងថា ករណីនេះ គឺសមត្ថកិច្ចមន្ទីរប្រឆាំងគ្រឿងញៀន បានឡើងប្រកាសតាមវិទ្យុទាក់ទង ឱ្យកម្លាំងសមត្ថកិច្ច ពង្រាយកម្លាំងជួយតាមចាប់ឃាត់រថយន្តក្រុមជនសង្ស័យមួយក្រុម ម៉ាកអាល់ហ្វាត ពណ៌ស ពាក់ស្លាកលេខ 0365 បន្ទាប់ពីក្រុម ទាំងនោះ មានការផ្ទុះអាវុធជាមួយសមត្ថកិច្ច ពេលចុះបង្ក្រាបគ្រឿងញៀន ។ 

លោកអធិការរងបន្តថា លុះសមត្ថកិច្ចខាងមន្ទីរ ដេញរថយន្តខាងលើ រហូតដល់ចំណុចស្តុបផ្លូវ៦០ម៉ែត្រ កែង៥០ម៉ែត្រ ក៏ត្រូវសមត្ថកិច្ច ខណ្ឌដង្កោ ជួយស្ទាក់ចាប់ឃាត់បានតែម្តង ដោយឃាត់បានមនុស្ស ០៣នាក់។

ជុំវិញការបង្ក្រាបខាងលើនេះ គេនៅមិនទាន់ដឹងថា ប្រតិបត្តិការចុះបង្ក្រាបគ្រឿងញៀននេះ សមត្ថកិច្ចមន្ទីរប្រឆាំងគ្រឿងផ្តើមចុះបង្ក្រាបពី​ចំណុច​ឬគោលដៅ​ណា​មក​នោះទេ ​ដែលបណ្តាលឱ្យមានការផ្ទុះអាវុធតបតគ្នា ហើយបណ្តាលឱ្យកងកម្លាំងម្នាក់ត្រូវស្លាប់បែបនោះ ។

សូមចូលរួមសោកស្ដាយនិងចូលរួមរំលែកទុក្ខដ៏សែនក្រៀមក្រំជាមួយនឹងក្រុមគ្រួសារជនរងគ្រោះ ក្នុងបុព្វហេតុបង្ក្រាបបទល្មើស ដើម្បីការពារ សន្តិសុខ សណ្ដាប់ធ្នាប់ សុវត្ថិភាព គ្មានគ្រឿងញៀន ជូនដល់សង្គមជាតិ។

សមត្ថកិច្ចមិនទាន់បានបញ្ជាក់អំពីអត្តសញ្ញាណ មន្ត្រីនគរបាលដែលបានជួបគ្រោះថ្នាក់ដល់ជីវិតនេះនៅឡើយទេ ខណៈកំពុងបន្តធ្វើការ ស៊ើបអង្កេត ស្រាវជ្រាវ រកមុខសញ្ញាក្រុមជនពាក់ព័ន្ធ និងបន្តនីតិវិធីក្នុងការនាំខ្លួនជនសង្ស័យដើម្បីធ្វើការសាកសួរ ៕

IMG_3302 IMG_3303 IMG_3304

ដោយ ៖ រ៉ារ៉ា