សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ ៖ បុរសម្នាក់បានជិះម៉ូតូក្នុងល្បឿនលឿន ខណៈមេឃកំពុងតែភ្លៀងផង និងមិនប្រយ័ត្នផង ក៏ជ្រុលទៅបុករង្វង់មូលដែលទើបតែសាងសង់មិនមានសញ្ញាចំណាំង ពេញទំហឹង បណ្ដាលឱ្យដួលបោកក្បាលស្លាប់ភ្លាមៗនៅនឹងកន្លែង កាលពីវេលាម៉ោង១០យប់ថ្ងៃអង្គារ ទី១០ ខែមករា ឆ្នាំ២០២៣ ត្រង់ចំណុចរង្វង់មូលជិតគល់ស្ពានអាកាសជម្ពូវ័ន តាមបណ្តោយផ្លូវវិមានឈ្នះឈ្នះហៅផ្លូវទំនប់កប់ស្រូវ ក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។
ជនរងគ្រោះនៅមិនទាន់ស្គាល់អត្តសញ្ញានោះទេ ដោយ ស្លៀកពាក់អាវយឺតពណ៌ខ្មៅស្លៀកខោកាប៊ូយ ពណ៌ខ្មៅ ពាក់ស្បែកជើងប៉ាត់តាពណ៌ដី សម្បុរសល្មមកម្ពស់ប្រហែល១,៧០ម៉ែត្រ ជិះម៉ូតូម៉ាកឌ្រីម សេ125 ស៊េរីឆ្នាំ២០២២ ពណ៌ខ្មៅ ពាក់ស្លាកលេខ ភ្នំពេញ1JO.4144 ។
តាមប្រភពព័ត៌មានពីកន្លែងកេីតហេតុបានឲ្យដឹងថា មុនកេីតហេតុគេឃើញបុរសជនរងគ្រោះជិះម៉ូតូតាមបណ្ដោយផ្លូវវិមានឈ្នះឈ្នះ ក្នុងទិសដៅពីជើងមកត្បូង យ៉ាងលឿនក៏បានជ្រុលទៅបុកខឿនថ្មរង្វង់មូលដែលគេសាងសង់មិនទាន់រួចមិនទាន់មានភ្លើងបំភ្លឺ ផ្លូវមិនទាន់មានចំណាំងផ្លាត គួបផ្សំមេឃកំពុងតែភ្លៀងនិងងងឹតផងនោះបណ្ដាលឱ្យ បែកមួកសុវត្តិភាពបែកក្បាលបាក់ករស្លាប់ភ្លាមៗនៅហ្នឹងកន្លែងកើតហេតុ។ ចំណែកឯម៉ូតូគឺបាក់កង់ខាងមុខខ្ទេចយ៉ាងដំណំ។
ក្រោយកើតហេតុ សមត្ថកិច្ចជំនាញចរាចរណ៍ខណ្ឌចុះមកវាស់វែងយកម៉ូតូទៅរក្សាទុកនៅអធិការដ្ឋាននគរបាលខណ្ឌពោធិ៍សែនជ័យបណ្ដោះអាសន្ន ។ ចំណែកឯសពជនរងគ្រោះ ត្រូវបានសមត្ថកិច្ចធ្វើកំណត់ហេតុរួចប្រគល់ឱ្យក្រុមរថយន្តដឹកសពយកទៅតម្កល់ទុកនៅវត្តទឹកថ្លាដើម្បីស្រាវជ្រាវរកសាច់ញាតិមកទទួលយកធ្វើបុណ្យតាមប្រពៃណីនាពេលក្រោយ ៕
ដោយ ៖ ភារ៉ា ដង្កោ
