🔴តើអាជ្ញាធរខណ្ឌជ្រោយចង្វាដឹងឬធ្វើមិនដឹង ខណៈទុកឱ្យលោកឡាន ពីវិន ចាក់ដីចូលជ្រៅទៅក្នុងទន្លេពង្រីកទំហំ ១១.២៤៦ម៉ែត្រការ៉េ នៅសង្កាត់កោះដាច់ !

ភ្នំពេញ ៖ រឿងចាក់ដីរំលោភយកច្រាំងទន្លេរហូតដល់មានទំហំចាក់ដីចូលជ្រៅទៅក្នុងទន្លេពង្រីកបានដល់ ១១.២៤៦ម៉ែត្រការ៉េ មិនមែនជារឿងធម្មតា នោះទេ ហើយមេត្តាអាជ្ញាធរភូមិ សង្កាត់ ខណ្ឌ តិចច្រឡំមាត់ថា មិនដឹង មិនហ៊ានហាមឃាត់ មិនមានសមត្ថភាពផ្អាកសកម្មភាពឱ្យសោះ ខណៈដែលអស់លោកមានអំណាចតាមរយៈថ្នាក់លើ បានប្រតិភូកម្មអំណាចឱ្យពេញដៃហើយ បើមានអំពើរំលោភបំពានច្បាប់ក្នុងមូលដ្ឋាន គឺមានសិទ្ធិគ្រប់គ្រាន់ក្នុងការបង្ក្រាប ហាមឃាត់ តាមវិធានការរដ្ឋបាល នៃអំណាចមូលដ្ឋាន វាជៀសតែមិនដេកធ្វើជាដេកលក់ប៉ុណ្ណោះ។ 

សូមបញ្ជាក់ថា លោក ឡាន ពីវិន ដែលគេចាត់ទុកជាអ្នកមានលុយ មានអំណាចដោយសារលុយពិតជាថ្លើមធំមែន បានធ្វើសកម្មភាពចាក់ដីលុបច្រាំងទន្លេពង្រីកដីច្រាំងទន្លេធ្វើជាកម្មសិទ្ធិរបស់ខ្លួន ក្រោមក្រសែភ្នែកអាជ្ញាធរភូមិ សង្កាត់ ខណ្ឌ សំងំលង់លក់ក្នុងដំណេកផង ជននេះបានប្រើពេលយូរថ្ងៃ ប្រើប្រាស់គ្រឿងចក្រ ឡានដឹកដី ខ្សាច់ចាក់ចូលជ្រៅទៅក្នុងទន្លេពង្រីកទំហំរហូតដល់ ១១.២៤៦ម៉ែត្រការ៉េ នៅសង្កាត់កោះដាច់។ 

ប៉ុន្តែត្រូវបាន លោក ឃ្លាំង ហួត អភិបាលរងរាជធានីភ្នំពេញទទួលព័ត៌មានទាន់ក៏បានដឹកនាំក្រុមការងារចុះទៅចាត់វិធានការឱ្យធ្វើរបងត្រឹមតែដីកម្មសិទ្ធិដែលខ្លួនមានប៉ុណ្ណោះ នៅសល់ដីដែលខ្លួនបានពង្រីករួចទៅហើយនោះ ទុកធ្វើជាសម្បត្តិសាធារណៈរបស់រដ្ឋ ទុកជាប្រយោជន៍សម្រាប់ប្រជាពលរដ្ឋប្រើប្រាស់នៅពេលមានកិច្ចការអ្វីមួយនៅលើដីនោះ។ និយាយរួមជននេះត្រូវប្រឈមនឹងច្បាប់ព្រហ្មទណ្ឌ ខណៈដែលច្បាប់ភូមិបាលមិនអនុញ្ញាតអោយរំលោភយកច្រាំងទន្លេឡើយ។ 

ករណីនេះ មហាជននិងប្រជាពលរដ្ឋដែលរស់នៅភូមិនេះ សង្កាត់កោះដាច់ បានអំពាវនាវផងដែរដល់មន្ត្រីអាជ្ញាធរ សូមឱ្យឧស្សាហ៍ចុះទៅពិនិត្យមើលទីកន្លែងដែលគេរំលោភយកច្រាំងទន្លេ និងចាក់ដីពង្រីកច្រាំងទន្លេនោះផង ក្រែងភ្លេចៗខ្លួន ស្រាប់តែគេព័ទ្ធរបងរំលោភយកដីទាំងនោះវិញក៏ថាបាន ដូច្នេះសូមមន្ត្រីអាជ្ញាធរឧស្សាហ៍ចុះទៅពិនិត្យមើលផង, ចំណែកប្រជាពលរដ្ឋសូមចូលរួមតាមដានទាំងអស់គ្នា ដើម្បីការពារផ្ទៃដីដែលជាសម្បត្តិរបស់រដ្ឋ។ 

ក្នុងករណីរំលោភយកច្រាំងទន្លេប្រព្រឹត្តដោយ លោក ឡាន ពីវិន ត្រូវបានក្រុមមន្ត្រីអាជ្ញាធរចុះពិនិត្យចាត់វិធានការលើអ្នករំលោភដីច្រាំងទន្លេនេះ ធ្វើឡើងនាព្រឹកថ្ងៃទី២៣ ខែមីនា ឆ្នាំ២០២៣ ដឹកនាំដោយ លោក ឃ្លាំង ហួត អភិបាលរងរាជធានីភ្នំពេញ មានការចូលរួមពីមន្ត្រីអាជ្ញាធរខណ្ឌជ្រោយចង្វានិងសង្កាត់កោះដាច់ ដែលមានទីតាំងស្ថិតនៅភូមិរនះ សង្កាត់កោះដាច់ ខណ្ឌជ្រោយចង្វា រាជធានីភ្នំពេញ។ 

តាមការដឹកនាំបញ្ជាពីលោក ឃ្លាំង ហួត អភិបាលរងរាជធានីភ្នំពេញ គេឃើញក្រុមការងារមានខាងមន្ត្រីអាជ្ញាធរ មន្ត្រីជំនាញ បានធ្វើការពិនិត្យវាស់វែងផ្ទៀងផ្ទាត់ប័ណ្ណសម្គាល់សិទ្ធិកាន់កាប់អចលនវត្ថុ លេខៈភព ៧៣៧២៧ របស់ឈ្មោះ ឡាន ពីវិន រកឃើញថា ដីនេះមានទំហំ ៨៣៣៨ ម៉ែត្រការ៉េប៉ុណ្ណោះជាដីកម្មសិទ្ធិស្របច្បាប់ ។  ប៉ុន្តែលោក ឡាន ពីវិន បានចាក់ដីពង្រីកច្រាំងទន្លេលើសពីដីក្នុងប័ណ្ណរហូតដល់ទំហំ ១២៦៥២ ម៉ែត្រការ៉េ និងបានចាក់ដីចូលជ្រៅទៅក្នុងទន្លេពង្រីកទំហំ ១១២៤៦ម៉ែត្រការ៉េ។

ភ្លាមៗនោះ  លោក ឃ្លាំង ហួត អភិបាលរងរាជធានីភ្នំពេញ បានមានចំណាត់ការ ៤ចំណុច ដូចខាងក្រោម : 

ទី១-តម្រូវឱ្យម្ចាស់ដី ឈ្មោះ ឡាន ពីវិន ដែលបានចាក់ដីចូលទន្លេសាងសង់ច្រាំង ត្រូវបញ្ឈប់ជាបន្ទាន់ បើពុំនោះទេ នឹងចាត់វិធានការតាមផ្លូវច្បាប់យ៉ាងម៉ឺងម៉ាត់បំផុត ដោយគ្មានយោគយល់ លើកលែង។ 

ទី២- ណែនាំឱ្យម្ចាស់ដីគ្រប់គ្រង និងស្នើសុំសាងសង់អ្វីមួយគឺធ្វើត្រឹមតែលើដីកម្មសិទ្ធិរបស់ខ្លួនដែលមានទំហំ ជាង ៨៣៣៨ម៉ែត្រការ៉េ តែប៉ុណ្ណោះ ។  ចំណែកដីទំហំ ១២៦៥២ ម៉ែត្រការ៉េ ដែលជាដីច្រាំងដុះ និងដីដែលបានចាក់ចូលជ្រៅទៅក្នុងទន្លេខុសច្បាប់ ទំហំ ១១២៤៦ម៉ែត្រការ៉េនោះ ត្រូវទុកជាសម្បត្តិរដ្ឋ ដើម្បីបម្រើជាប្រយោជន៍សាធារណៈ ។

ទី៣-ក្នុងករណីជនទាំងឡាយណាចង់ ប្រើប្រាស់ដីនេះ លុះត្រាតែស្នើសុំទៅរាជរដ្ឋាភិបាល។

ទី៤-ជាមួយគ្នានេះ អាជ្ញាធររាជធានីភ្នំពេញ ធ្វើការវាស់វែងព្រំដីឡើងវិញ ដោយកំណត់យកព្រំដីចាស់ ដោយមិនអនុញ្ញាតឱ្យម្ចាស់ដីធ្វើការចាក់ដីរំលោភបំពានចូលច្រាំងទន្លេទៀតនោះទេ ប្រសិនឃើញមានរំលោភបំពានលើកក្រោយទៀត នឹងចាត់វិធានការតាមផ្លូវច្បាប់ម៉ឺងម៉ាត់។

សូមបញ្ជាក់ផងដែរថា, បញ្ហាចាក់ដីរំលោភយកច្រាំងទន្លេមិនមែនជារឿងដែលអាជ្ញាធរថ្នាក់ភូមិ-សង្កាត់-ខណ្ឌ មិនដឹងមនុស្សនោះឡើយ។ ភាគច្រើនអាចពាក់ព័ន្ធទៅនឹងអំពើឃុបឃិតគ្នាក្នុងផលប្រយោជន៍ណាមួយ , ការយោគយល់មនោសញ្ចេតនានិងសេដ្ឋកិច្ច , ករណីខ្លះ ហាមឃាត់ក៏ហាម អនុញ្ញាតឱ្យលួចធ្វើសកម្មភាពក៏ឱ្យធ្វើ តែមិនទទួលខុសត្រូវពេលថ្នាក់លើបានដឹង ! ដូចជាសកម្មភាពដែលប្រព្រឹត្តដោយ លោក ឡាន ពីវិន ចាក់ដីចូលជ្រៅទៅក្នុងទន្លេពង្រីកទំហំ ១១២៤៦ម៉ែត្រការ៉េ នៅសង្កាត់កោះដាច់ ! ប្រជាពលរដ្ឋក្នុងមូលដ្ឋាន និងអាជ្ញាធរក្នុងមូលដ្ឋានមួយចំនួនពិតជាមិនពេញចិត្ត មិនគាំទ្រចំពោះការរំលោភយកជ្រាំងទន្លេនេះឡើយ។ ប៉ុន្តែពួកគាត់គ្មានសិទ្ធិនិងអំណាច បានត្រឹមតែការសោកស្ដាយ រិះគន់ ខណៈថ្នាក់លើក្នុងមូលដ្ឋានមានការយោគយល់ឬត្រូវរ៉ូវគ្នារួចទៅហើយ។ ទីបំផុត ! ពេលឃើញ លោក ឃ្លាំង ហួត អភិបាលរងរាជធានីភ្នំពេញ ដឹកនាំសមត្ថកិច្ចនិងមន្ត្រីជំនាញចុះហាមឃាត់ ទាំងមន្ត្រីទាំងប្រជាពលរដ្ឋមានការគាំទ្រ និងសូមឱ្យអាជ្ញាធរបន្តធ្វើកិច្ចការនេះឱ្យបានញឹកញាប់ដូចភ្លៀងរលឹម ដើម្បីការពារទ្រព្យសម្បត្តិសាធារណៈរបស់រដ្ឋ ៕

ដោយ ៖ សិលា