សារព័ត៌មាន នគរវត្ត តែងតែនាំមុខគេជានិច្ច
ការបោះឆ្នោតនៅក្នុងប្រទេសថៃកាន់តែខិតមកជិត ហើយគណបក្ស៣ ដែលនាំមុខគេនោះ មាន ២គណបក្ស គឺ គណបក្ស ចលនាឆ្ពោះទៅមុខ MFP ប្រកាសថានឹងចូលរួមបង្កើតរដ្ឋាភិបាលជាមួយគណបក្សភឿថៃ។
ព័ត៌មាន Bangkok Post នៅថ្ងៃចន្ទ ទី១៥ ខែឧសភា ឆ្នាំ២០២៣ បានផ្សាយថា មេដឹកនាំគណបក្សចលនាឆ្ពោះទៅមុខ (MFP) លោក ភីថា លីមចារឿនរ៉ាត់ (Pita Limjaroenrat) បានទទួលស្គាល់ថាគណបក្សរបស់លោកនឹងបង្កើត រដ្ឋាភិបាលចម្រុះមួយជាមួយគណបក្សភឿថៃ និងគណបក្សប្រឆាំងដទៃទៀត ហើយនឹងមិនចូលរួមជាមួយគណបក្សគាំទ្រដោយយោធាថៃនោះទេ។
ថ្លែងនៅបន្ទាប់ពីការប្រកាសលទ្ធផលបោះឆ្នោតបឋមកាលពីថ្ងៃអាទិត្យ ទី១៥ ខែឧសភា លោក ភីថា បានបញ្ជាក់ថាគណបក្សចលនាឆ្ពោះទៅមុខ (MFP) និងគណបក្សភឿថៃ អាចនឹងទទួលបានប្រមូលបានអាសនៈគ្រប់គ្រាន់នៅក្នុងរដ្ឋសភា ដើម្បីបង្កើតរដ្ឋាភិបាល។ «នេះជាសញ្ញាវេជ្ជមាន។ នេះគឺជាពេលដែលថៃ ត្រូវផ្លាស់ប្ដូរ»។ នេះការបញ្ជាក់បន្ថែមរបស់លោក ភីថា។
គួរបញ្ជាក់ថា បើតាមលទ្ធផលបោះឆ្នោតបឋម គណបក្សចលឆ្ពោះទៅមុខទទួលបានអាសនៈនៅឯរដ្ឋសភា ឬសភាជាន់ទាបចំនួន ១៥១អាសនៈ ភឿថៃបាន ១៤១អាសនៈ ហើយគណបក្ស Palang Pracharath បានត្រឹមតែ៤១អាសនៈ និងគណបក្សថៃរួបរួមជាតិ បាន ៣៦អាសនៈតែប៉ុណ្ណោះ។ ចំណែកឯ គណបក្សភូមិចៃថៃ (Bhumjaithai Party) ទទួលបាន៧០អាសនៈ។
តែទោះជាបែបនេះក្ដី លទ្ធផលបោះឆ្នោតនេះមិនទាន់អាចសម្រេចបានថាតើនរណានឹងក្លាយជានាយករដ្ឋមន្ត្រី ឬក៏នរណាអាចនឹងបង្កើតរដ្ឋាភិបាល បាននៅឡើយ ទេ។ ពីព្រោះការតែងតាំងនាយករដ្ឋមន្ត្រី ឬក៏ការបង្កើតរដ្ឋាភិបាលត្រូវធ្វើឡើងតាមរយៈរដ្ឋសភា និងព្រឹទ្ធសភា ដែលអាចនឹងប្រព្រឹត្តទៅនៅ ខែកក្កដាខាងមុខ។ ដូច្នេះ គណបក្សប្រឆាំងត្រូវរកដៃគូក្រុមចម្រុះ រីឯគណបក្សគាំទ្រដោយយោធាក៏ត្រូវរកដៃគូបង្កើតក្រុមចម្រុះដូចគ្នាដែរ។ បញ្ហាស្មុគស្មាញ គឺនៅត្រង់ថា សមាជិកព្រឹទ្ធសភា ទាំង២៥០នាក់ សុទ្ធតែត្រូវបានតែងតាំងដោយយោធា ម្លោះហើយពួកគេមុខជាមានទំនោរបោះឆ្នោតគាំទ្រដល់គណបក្ស ឬបេក្ខជននាយករដ្ឋមន្ត្រី គាំទ្រដោយ យោធា៕
ដោយ៖ ធីរីណា(រូបថត ៖ Bangkok Post)
