Update ៖ ឃុំខ្លួនជនជាតិចិនវ័យចំណាស់ម្នាក់ ដាក់ពន្ធនាគារជាបណ្តោះអាសន្នពាក់ព័ន្ធករណីជួញដូរគ្រឿងញៀន៤០គីឡូក្រាម

ភ្នំពេញ ៖ ចៅក្រមស៊ើបសួរសាលាដំបូងរាជធានីភ្នំពេញ កាលពីរសៀលថ្ងៃទី១៧ ខែឧសភា ឆ្នាំ២០២៣ បានសម្រេចចេញដីកាឃុំខ្លួនបុរសជនជាតិចិនវ័យចំណាស់ម្នាក់ ដាក់ពន្ធនាគារជាបណ្តោះអាសន្ន ពីបទ.រក្សាទុក និងដឹកជញ្ជូនគ្រឿងញៀនដោយខុសច្បាប់ ។ 

ជនត្រូវចោទឈ្មោះ ចូវ គ័រឆាវ ភេទប្រុស អាយុ៦០ ឆ្នាំ មុខរបរ មិនពិតប្រាកដ ស្នាក់នៅផ្ទះលេខ៣៧ ផ្លូវលេខ២២ សង្កាត់សំរោងក្រោម ខណ្ឌពោធិសែនជ័យ រាជធានីភ្នំពេញ ។ 

ប្រតិបត្តិការបង្រ្កាបគ្រឿងញៀននេះ បានធ្វើឡើងកាល ពីថ្ងៃទី១៤ ខែឧសភា ឆ្នាំ២០២៣ ក្រោមការដឹកនាំបញ្ជាដោយនាយឧត្តមសេនីយ៍ ម៉ក់ ជីតូ អគ្គស្នងការរង នគរបាលជាតិ ទទួលការងារប្រយុទ្ធប្រឆាំងគ្រឿងញៀន នឹងលោកឧត្តមសេនីយ៍ឯក ឃឹង សារ៉ាត នាយកមន្ទីរប្រឆាំងគ្រឿងញៀន ដោយមានការសម្របសម្រួលពីលោក អ៊ំ សុភក្តិ ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ។

លទ្ធផលធ្វើការដកហូតសារធាតុញៀនដូចជា ៖

១.ក្រាមពណ៌សថ្លាជាប្រភេទសារធាតុ មេតំហ្វេតាមីន ទម្ងន់ ៧២៦ ក្រាម ។

២.ថ្នាំគ្រាប់ពណ៌ទឹកក្រូច សារធាតុ មេតំហ្វេតាមីន WY ទម្ងន់ ៣៩៥៨ ក្រាម ។

៣.សារធាតុរាវ ចំនួន ១៨០ អំពូល សរុបទម្ងន់ ៩០០ ក្រាម ។

៤.សារធាតុរាវ ចំនួន២ ដប ទម្ងន់ ៣០០០ ក្រាម ។

៥.សារធាតុរាវចំនួន២ដប ទម្ងន់ ៤០ ០០០ ក្រាម ។

៦.សារធាតុរាវចំនួន ៥ដប ទម្ងន់ ២៥០០ ក្រាម ។

៧.ម្សៅម៉ត់ពណ៌ សទម្ងន់ ១៨ ៨៩០ ក្រាម ។

៨.ម្សៅម៉ត់ពណ៌បៃតងទម្ងន់ ១០ ១១៦ ក្រាម ។

៩.ម្សៅពណ៌លឿងក្នុងកញ្ចប់អក្សរ TANG ចំនួន ២៧ កញ្ចប់ ទម្ងន់ ១៣ ៥០០ ក្រាម ។

១០.ម្សៅម៉ត់ពណ៌ស ទម្ងន់ ៣៣១០ ក្រាម ។

១១.ម្សៅពណ៌ទឹកក្រូច ទម្ងន់ ២៦០២ ក្រាម ។ 

១២.ម្សៅម៉ត់ពណ៌ក្រហម ទម្ងន់ ១០៩៦ ក្រាម ។ 

១៣.ក្រាមពណ៌ សថ្លា ទម្ងន់ ៥១៤ ក្រាម ។ 

សរុប ៖ 

.មេតំហ្វេតាមីន ទម្ងន់ ៤៦៨៤ ក្រាម ស្មើ ៤គីឡូ៦៨៤ ក្រាម ។

.សារធាតុគីមីផ្សំ ទម្ងន់ ៣០០០ ក្រាម ស្មើ ៣គីឡូក្រាម ។

.សារធាតុគីមី ទម្ងន់ ៤០ ០០០ ក្រាម ស្មើ ៤០ គីឡូក្រាម ។

.សារធាតុមិនច្បាស់លាស់ ទម្ងន់ ៥៣ ៤២៨ ក្រាម ស្មើ៥៣ គីឡូ ៤២៨ ក្រាម ៕

ដោយ ៖ រ៉ារ៉ា