សារព័ត៌មាន នគរវត្ត តែងតែនាំមុខគេជានិច្ច
ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅព្រឹកថ្ងៃសៅរ៍ ៨កើត ខែជេស្ឋ ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៧ ខែឧសភា ឆ្នាំ២០២៣នេះ បានថ្លែងប្រសាសន៍សំខាន់ៗនាឱកាសអញ្ជើញសំណេះសំណាលជាមួយកម្មករ និយោជិតសរុបចំនួន ១៩,០០០នាក់។ ក្នុងនោះកម្មករ និយោជិតទាំងអស់នេះ មកពីរោងចក្រ សហគ្រាស ចំនួន៨១ ក្នុងនោះរោងចក្រវិស័យកាត់ដេរ ចំនួន១៣ និងក្រៅពីកាត់ដេរ ចំនួន៦៨ ដែលមកពីតំបន់សេដ្ឋកិច្ចពិសេស រ៉ូយ៉ាល់ គ្រុបភ្នំពេញទាំងអស់។
សូមអានប្រសាសន៍សំខាន់ៗរបស់សម្តេចតេជោ ហ៊ុន សែន មានដូចខាងក្រោម៖
សម្តេចតេជោ ហ៊ុន សែន ប្រកាសអំពាវនាវដល់កម្មករ-កម្មការិនីរោងចក្រកាត់ដេររួមគ្នារក្សាសុខសន្តិភាព ដែលជាផ្នែកដ៏សំខាន់មិនអាចកាត់ថ្លៃបានសម្រាប់វឌ្ឍនភាពសង្គម និងភាពសុខសាន្តរបស់ប្រជាពលរដ្ឋ…[]«អ្នកស្វែងរកសន្តិភាព គឺជាអ្នកការពារសុខសន្តិភាព»។
សម្តេចតេជោ អំពាវនាវឱ្យបណ្តារោងចក្រនានាផ្តល់ឱកាសឱ្យកម្ម ការិនីមានផ្ទៃពោះចេញមុនគេ(ចេញពីធ្វើការ) ដើម្បីបញ្ជៀសការប្រជ្រៀតគ្នា នាំឱ្យមានប៉ះទង្គិចកូនក្នុងផ្ទៃ។
សម្តេចតេជោ អំពាវនាវដល់កម្មករ-កម្មការិនីរោងចក្រ និងចៅកែរោងចក្រ ស្រុះស្រួលគ្នា កុំស្តាប់តាមការញុះញង់របស់បុគ្គល ឬក្រុមប្រឆាំងណាមួយ ដែលនាំទៅដល់ការខូច ប្រយោជន៍ ទាំងសងខាង។
សម្តេចតេជោ ថ្លែងថា កម្មករ-កម្មការិនីរោងចក្រ និងថៅកែ មិនអាចខ្វះ ឬកាត់ផ្តាចពីគ្នាបានឡើយ។ ថៅកែអត់កម្មករ ក៏មិនបាន។ កម្មករអត់ថៅកែ ក៏មិនបានដូចគ្នា។
សម្តេចតេជោ ប្រកាសមិនអត់ឱនឱ្យនរណា ឬក្រុមណាក៏ដោយ ដែលមានបំណងចង់បំផ្លាញសុខសន្តិភាព និងដណ្តើមអំណាចតាមរយៈមិនឆ្លងកាត់តាមរយៈការបោះឆ្នោត ឬប្រជាធិបតេយ្យសេរី។
សម្តេចតេជោ ថ្លែងរំលឹកគ្រាលំបាកពីអតីតកាល ដែលរាជរដ្ឋាភិបាលបានប្រឹងប្រែងយ៉ាងខ្លាំងដើម្បីកៀរគរវិនិយោគិនមកបណ្តាក់ទុករកស៊ីនៅកម្ពុជា ។ សម្តេចបញ្ជាក់ថា «បើគ្មានការវិនិយោគទេ ម្លេះពេលនេះកម្មក-កម្មការិនី កំពុងធ្វើស្រែ ធ្វើចំការ ឬលក់ដូតតិចតូចនៅផ្ទះឯណោះទេ»។
សម្តេចតេជោ ថ្លែងថា ខណៈដែលកម្ពុជាកំពុងមានសុខសន្តិភាព យើងត្រូវកសាងនូវហេដ្ឋារចនាសម្ព័ន្ធ វិស័យអគ្គិសនី ទឹក និងវិស័យជាច្រើនទៀត ដើម្បីឆ្លើយតបទៅនឹងតម្រូវការ របស់អ្នកវិនិយោគក្នុងស្រុក និងក្រៅស្រុក។
សម្តេចតេជោ បានលើឡើងពីទ្រឹស្តីក្រុម នយោបាយមួយក្រុម ដែលមានបំណងយកលុយពីអ្នកមាន មកឱ្យអ្នកក្រ ជានយោបាយមួយមិនខុសពីរបបប៉ុលពត ខ្មែរក្រហមនោះទេ ដែលនៅលើពិភពលោកគ្មានប្រទេសណា ធ្វើដូច្នោះឡើយ។
សម្តេចតេជោ ថ្លែងថា គ្រាន់តែវិស័យ កាត់ដេរ មួយមុខ កម្ពុជាទទួលបានចំណូលតាមរយៈកម្មករ-កម្មការិនី រោងចក្រកាត់ដេរប្រមាណ៣.០០០លានដុល្លារអាមេរិក។
សម្តេចតេជោ ថ្លែងថា រយៈពេល៤ខែ ក្នុងឆ្នាំ២០២៣នេះ កម្ពុជាបាននាំចេញផលិតផលទៅក្រៅ ប្រទេសក្នុងចំនួនទឹកប្រាក់ជាង៧.០០០លានដុល្លារអាមេរិក ក្នុងនោះវិស័យកាត់ដេរដើរតួនាទីយ៉ាងសំខាន់។
សម្តេចតេជោ រំពឹងថា រោងចក្រសហគ្រាស់នីមួយៗ នឹងក្លាយទៅជាកន្លែងសុខសាន្ត និងសំបូរសប្បាយ ដោយពុំមាន អំពើហិង្សា ការប្រើប្រាស់គ្រឿងញៀន និងមិនមែន ជាកន្លែង ប្រណាំងម៉ូតូ។
សម្តេចតេជោ ប្រកាសដល់បរទេសទាំងឡាយ ដែលនៅពីក្រោយ ឬផ្តល់ការគាំទ្រជំនួយស្មារតី សម្ភារៈ និងថវិកាដល់ក្រុមប្រឆាំង ចង់ផ្តួលរំលំរាជរដ្ឋាភិបាលស្របច្បាប់ សូមដកខ្លួនចេញ ទុកឱ្យកម្ពុជាប្រើប្រាស់ច្បាប់ និងសកម្មភាពផ្សេងៗដើម្បីភាពសុខសាន្តប្រទេសជាតិ និងភាពសំបូរសប្បាយរបស់ប្រជាពលរដ្ឋ។
សម្តេចតេជោ ថ្លែងថា វាជារឿងអយុត្តិធម៌ពន់ពេកណាស់ចំពោះគ្រួសារថាក់ស៊ី(ថាក់ស៊ីន ស៊ីណាវ៉ាត្រា និងយីងឡាក់) ដែលត្រូវគេធ្វើរដ្ឋប្រហារទម្លាក់ពីតំណែងនាយករដ្ឋមន្ត្រីជាបន្តបន្ទាប់ គ្មានបរទេសណា ឬក្រុមប្រឆាំងណាមួយចេញមុខផ្កោលទោស ឬប្រឆាំងសកម្មភាពរដ្ឋប្រហារនោះឡើយ។
សម្តេចតេជោ ថ្លែងថា សម្តេចចំណាយកម្លាំងចុះជួបកម្មករ និយោជិត មិនអត់ប្រយោជន៍នោះទេ។ សម្តេចតេជោ ណែនាំឱ្យក្រសួងការងារ និងថៅកែរោងចក្រ ប្រឹងប្រែងអនុវត្តន៍ឱ្យបាននូវគោលការណ៍ទាំងឡាយ ដែលសម្តេចបានដាក់ចេញជាប្រយោជន៍សម្រាប់កម្មករ និយោជិត។
សម្តេចតេជោ ថ្លែងថា ការធ្វើកសិកម្មតែមួយមុខមិនអាចឱ្យប្រទេសក្លាយជាអ្នកមានបាននោះឡើយ។ សម្តេចតេជោ បញ្ជាក់ថា ដោយសារកសិកម្មតែមួយមុខមិនអាចធ្វើឱ្យកម្ពុជាក្លាយជាអ្នកមាននេះហើយ ទើបសម្តេចប្រឹងប្រែងទាក់ទាញការវិនិយោគពីក្រៅប្រទេស ជំរុញវិស័យឧស្សាហកម្ម។
សម្តេចតេជោ ថ្លែងថា សូម្បី ឡេនីន ក៏បានលើកឡើងដែរថា បើគ្មានថៅកែ គឺគ្មានកម្មករនោះឡើយ។ ដើម្បីសុខដុមក្នុងរោងចក្រ គឺត្រូវតែមានការរួមគ្នារវាងថៅកែ និងកម្មករ។
សម្តេចតេជោ ហ៊ុន សែន អំពាវនាវប្រជាពលរដ្ឋចូលរួមគាំទ្រការប្រកួតកីឡាជនមានពិការភាព អាស៊ានប៉ារ៉ាហ្គេម។
សម្តេចតេជោ ហ៊ុន សែន អំពាវនាវកម្មករ និយោជិត នាំគ្នាទៅបោះឆ្នោតនៅថ្ងៃទី២៣ ខែកក្កដា។ សម្តេចតេជោ ក៏បានថ្លែងអំណរគុណកម្មករ និយោជិត ដែលបានបោះឆ្នោតជូនគណបក្សប្រជាជនកម្ពុជា អ្នកការពារសុខសន្តិភាព៕
ដោយ៖ ស តារា
