សារព័ត៌មាន នគរវត្ត តែងតែនាំមុខគេជានិច្ច
ខេត្តពោធិ៍សាត់៖ បុរសម្នាក់ស្លាប់នៅកន្លែងកើត ខណៈបុរសម្នាក់ទៀតស្លាប់ពេលមិត្តភក្តិដឹកយកទៅសង្គ្រោះនៅមណ្ឌលសុខភាព បន្សល់ទុកតែម៉ូតូ ក្នុងឧបទ្ទវហេតុគ្រោះថ្នាក់ចរាចរណ៍ រវាងម៉ូតូនឹងម៉ូតូបើកបរក្នុងទិសដៅច្រាសគ្នា នៅលេីកំណាត់ផ្លូវជាតិលេខ០៥ ចន្លោះគីឡូម៉ែត្រលេខ២០៥-២០៦ ស្ថិតនៅភូមិព្រៃស្វាយ ឃុំបឹងខ្នារ ស្រុកបាកាន ខេត្តពោធិ៍សាត់ កាលពីវេលាម៉ោង ១០និង៣០នាទីយប់ថ្ងៃទី០២ ខែមិថុនា ឆ្នាំ២០២៣ ។
លោកវរសេនីយ៍ទោ ប្រាក់ យូស័រ អធិការរង នៃអធិការដ្ឋាននគរបាលស្រុកបាកាន បានឱ្យដឹងនៅថ្ងៃសៅរ៍ទី០៣ ខែមិថុនា ឆ្នាំ២០២៣នេះថា៖ ដោយទទួលព័ត៌មានពីប្រជាពលរដ្ឋ ថាមានករណីគ្រោះថ្នាក់ចរាចរណ៍ រវាងម៉ូតូម៉ាកវេវអាល់ហ្វា ពណ៍ខ្មៅ ពាក់ស្លាកលេខពោធិ៍សាត់ 1L-3257 ធ្វើដំណើរក្នុងទិសដៅ ពីលិចទៅកេីត បើកបរដោយឈ្មោះ ឆឹង នួន ភេទប្រុស អាយុ៣៤ឆ្នាំ រស់នៅភូមិដេីមច្រេស ឃុំបឹងខ្នារ ស្រុកបាកាន (ស្លាប់នៅកន្លែងកេីតហេតុ) មកដល់ចំណុចកេីតហេតុខាងលេីបានបុកជាមួយម៉ូតូ មួយគ្រឿងទៀតម៉ាកឃ្លីក ពណ៍ស លាយខៀវ ពាក់ស្លាកលេខបាត់ដំបង 1N-5379 បេីកបរពីកេីតទៅលិច ដោយពុំស្គាល់អត្តសញ្ញាណរងរបួសធ្ងន់ ត្រូវបានមិត្តភ័ក្តដឹកទៅមណ្ឌលសុខភាព ដេីម្បីជួយសង្គ្រោះ។
លោកអធិការរង បានបន្តថា ក្រោយសមត្ថកិច្ចធ្វើការស៊ើបសួរគ្រូពេទ្យអំពីបុរសរងគ្រោះ លោកគ្រូពេទ្យបានបញ្ជាក់ថា ជនរងគ្រោះដែលមានមិត្តភក្តិជូនមកមណ្ឌលសុខភាព បានស្លាប់ពេលបញ្ជូនមកមណ្ឌលសុខភាព។ ក្រោយឮដូចនេះមិត្តភក្តិរបស់ជនរងគ្រោះ បានលើកសាកសពដាក់ម៉ូតូដឹកទៅទិសខាងលិចបាត់ទៅ ដោយពុំបានកត់ត្រាអំពីអត្តសញ្ញាណទាន់នោះទេ ។
សូមជម្រាបថា ចំពោះសពឈ្មោះ ឆឹង នួន សមត្ថកិច្ចបានប្រគល់ជូនក្រុមគ្រួសារ យកទៅធ្វេីបុណ្យតាមប្រពៃណី រីឯវត្ថុតាងម៉ូតូទាំង០២គ្រឿង ត្រូវបានយកមករក្សាទុកនៅប៉ុស្តិ៍នគរបាលរដ្ឋបាលបឹងខ្នារជាបណ្តោះអាសន្ន៕
ដោយ៖ សហការី
